Мөшкәчәр күцәмҗтәһәр көдлв

Эндр дотр-дундын кергүдин министерствин медлд бәәдг бүрдәцст көдлсн ветеранмуд сән өдрән темдглҗәнә. Полицин әңгүдт олн җилдән даавртаһар, седклән тәвҗ көдлсн улсиг эн өдр темдглҗ йөрәдг авъяста. Полицин ветеранмудын сән өдрлә ирлцҗ, ведомствд олн җилдән үнн-чик седклтәһәр көдлсн улсин тускар газетин халхст даңгин бичнәвидн.

Хөрн һурвн җилдән Хальмг Таңһчин дотр-дундын бүрдәцст юстицин подполковник Валентин Намров көдлв. Бичкнәсн авн эн зөргтә, шулун-шудрмг, керсү ухата көвүн болҗ өсв. Дунд сурһульд сурч йовсн цагтан Валентин зөв-йос харлһна халхар көдлхәр седҗәхән медулв. Ах классмудт сурчаһад, Хальмгин дотр-дундын кергүдин министерствин сурһулин төвд шишлң медрл авсмн. Элстин классическ гимназь төгсәсн хөөн Әрәсән МВД-н Аһш балһсна академьд орҗ сурв. Валентин сурһулян сәәнәр сурад, мөшкәчин эрдмтә болад, ирлцңгү көдлмшт насн-җирһлән нерәдсн болдг.
2003 җилд баахн мергҗлт Валентин Намров Элст балһсна дотр-дундын әңгд күч-көлснә хаалһан эклв. Тенд экономикин халхар эвдсн йовдлмудыг мөшкдг болв. Энүнә тодлсар, тер цагт тиим кергүд олар бүтәгдсн төләд өдр-сө уга эн көдлдг билә. Хулха келһнә, мек-тах һарһлһна болн талдан кергүдиг ахр цагин болзгт шинҗләд көдлмшән күцәдмн. Хойр җилдән дамшлтан хоршаһад, 2005 җиләс авн Валентин Борисович Хальмг Таңһчин МВД-н мөшклһнә әңгд көдлдг болв.
Энд көдлмшин кемҗән улм икдв, гиҗ келх кергтә. Болв Валентин Борисович седклән тәвҗ, кергән урдк кевәрн цаг болзгтнь күцәхәр шунв. Экономическ халхар, наркотик болн бу-селм тархалһна, келн-улсин хоорндк хәрлцәнә туст болн талдан чигн кергүд олар бүтәгддг болв.
2011 җилд дамшлтта көдләчиг Лаганя района мөшклһнә әңгин һардачд батлв, һурвн җилдән тенд күцәмҗтәһәр көдлсн болдг. Мел энүнә һардврт мана таңһчд түрүн болҗ экин сертификатыг олзлҗ мек-тах һарһсна кергүд зарһд хәләгдсн билә.
Хөөннь Валентин Намров таңһчин дотр-дундын кергүдин медлд бәәдг мөшклһнә әңгүдиг бүрткдг болв. Өдр болһн таңһчин райодын мөшклһнә әңгүдин бүтәгдсн кергүд ямр кевәр давҗахинь эн шинҗлҗ хәләдмн.
Мөшкәч күн дааврта, үнн-чик седклтә болх зөвтә, ямр чигн кергиг заканла ирлцҗ гүүнәр шинҗлх кергтә, гиҗ Валентин Борисович ухан-тоолврарн хувалцна.
Дөрвн җил хооран подполковник Валентин Намров ачта амрлһндан һарв. Дамшлтта мергҗлт гертән хара бәәсн уга, энүнд Хальмг Таңһчин делгрлтин саңд көдлх үрвр кегдҗ. Тегәд медрлән, дамшлтан олзлҗ, эндр күртл тенд күцәмҗтәһәр көдлҗәнә.
Үүрмүд дундан Валентин Борисович тоомср болн күндллһ олв. Таңһчин дотр-дундын кергүдин бүрдәцст көдлсн цагтан олн зүсн ачлврмудар темдглгдв. Шаңһа демәр эврә герән тосхв, Алия авальтаһан тавн күүкән өскчәнә. Герин эзн спортар соньмсад, цогц-махмудан батрулна, үрдән бас спортд орлцулна. Амрлһна өдрмүдән өрк-бүләрн хамдан сергмҗтәһәр давулна. Валентин Намров олна керг-үүлдврт орлцна, эндр көдлҗәдг баһ наста мөшкәчнрлә сүв-селвгәрн хувалцна.
Эврә цагтан хамдан көдлҗ йовсн Хальмгин МВД-н ветеранмудыг сән өдрләнь йөрәҗ, цугтаднь эн эрүл-менд болн цаһан хаалһ дурдв.

КАРСАНА Евгения
Зургт: Валентин Намров (тал дунднь) хамдан көдлсн үүрмүдтәһән