Арһлачнрин үүлдвриг темдглв

Хальмг Таңһчин селәнә эдл-ахун министрин үүл дааҗадг Гаван Тимур шаңһа бүрдәцсин һардачнрла селвлцә давулв. Одахн кесн сүл һурвн җилин ашар селәнә эдл-ахун шаңһа бүрдәцсин олз-орунь 350 сай арслң тогтав. Өдгә цагт энд 500 һар күн көдлнә, тедн дунд үкрчнр, хөөчнр, механизатормуд, зоотехникүд, агрономчнр мөн. Өдр болһн эдн цуһар таңһчин АПК-н халхин делгрлтд тәвцән орулҗ йовна.
Көдлмшт амр биш таал тогтагдснь бийнь урдк җилд цуг бүрдәцс зураһан күцәв, гиҗ темдглх кергтә. Зәрм эдл-ахус эврәннь мөңгәр шишлң техник хулдҗ авв. Тер мет бордлһна талвңгуд тосхгдад, малчнрин төлә болхла хошмудт сән кец-таалта гермүд бас босхгдҗана.
Селвлцәнә ашар селәнә эдл-ахун халхиг цааранднь делгрүлхин төлә ирлцңгү кесг төрмүдт онц оньг өгх болҗ шиидвр авгдв.
– Хальмгин Толһач Хаска Батун даалһврар аграрн-индустриальн регион болхин төлә нег һазра арһлачнр шунҗ көдлҗәнә. Тер мет орн-нутгт хулд-гүүлгәнә әәмшг уга бәәдл тогталһнд бас тәвцән орулҗана. Таңһчин фермермүдт болн селәнә эдл-ахун эдл-ууш кеҗ һарһҗадг арһлачнрт ханлтан өргҗәнәв, – гиҗ Тимур Сергеевич темдглв.
ОЛЬДАН Цаһан