Эцк көвүн хойр Антрацит балһснд харһв

Целинн района Хар Булг селәнд өсәд-боссн Буван Баатр Хальмг Таңһчар үүлддг Росгвардин заллтд җолачар көдләд, цөөкн җил хооран амрлһнд һарв. Сурһулян төгсәснә хөөн эн цергт мордад, көлгнә батальонд церглсмн. Тегәд хөөннь Росгвардин харулын цергллтд җолач болҗ көдлв.

Ачта амрлһнд һарсна хөөн Буван Баатр цергә шишлң керг-үүлдврт орлцх шиидвр авад, нидн Әрәсән харслтын Министерствлә бооца батлв. Тенд дамшлтта җолачнр кергтә болҗахиг медәд, Донецк Улсин Республикд «Урал» тамһта маши залҗ, дронмудас харслһна кергсл зөөнә. «Бумер» дуудврта дәәч хамдан церглҗәдг үүрмүд дунд дарунь күндллһ олв. Байн дамшлтта җолач цергә даалһвриг сәәнәр күцәдг деерән үүрмүдиннь көлгн эвдрсн цагт дарунь кергтә зи соляд дөң болна. Бийәсн дү цергчнрт Баатр Анатольевич ах чигн эцк чигн болад, килмҗән тусхахар шунна.
Бийнь эн әмтнлә үүрсг, үгтә-күүртә күн болна. Цергә даалһвр күцәҗ йовх залу улс ямаран күнд-күчр зовлң дааҗахиг маднд меддг арһ уга. Даалһвр күцәсн цагт кесгтән кеер сән хот угаһар өлсәд, даарад-муурад йовдг бийнь дәәчнр нег-негән дөңнәд, бүлән үгән келәд урмд өгнә. Буван Баатр эврәннь әңгдән ор һанцхн хальмг болна, энүнлә хамдан орс, хасг, маңһд болн нань талдан келн-улсин элчнр дәәлдҗ йовна. Гертәснь зәңг ирхлә, эдн байр-зовлңган әдл хувалцна. Хамдан церглҗ йовх үүрмүднь хальмг келн-улсин хот-хол амсв, тегәд эднд ода хөөнә дотр, махн, боорцг икәр таасгдв.
- Мана таңһчин әмтн цергә даалһвр күцәҗ йовх нег һазра улсиг сәәнәр дөңнҗ, дару-дарунь хот-хол, дулан хувц, олн зүсн кергсл өгүлнә. Одахн Баатр церглҗәдг әңгд дизельн генератор кергтә болв. Би Элст балһсна һардврин толһач Лиҗикә Алдрла харһад, терүг хулдҗ авхд дөң болхиг сурлав. Алдр Васильевич цөөкн өдрин эргцд эн төриг хаһлад, тиигәрән күргхд нөкд болв. Насарн баахн бийнь эн чадмг, арһта, үгдән күрдг һардач мөн. Баатрла хамдан церглҗәдг үүрмүднь ик ханлтта бәәнә, - гиҗ Оксана авальнь келнә.
Буван Баатр өрәл җилдән дәәлдснә хөөн амрлһнд ирсн билә. Гертнь авальнь, хойр көвүнь, эцкнь теңкән уга күләҗәсмн. Хәрҗ ирсн цагт энүг Хар Булг селәнә дунд сурһулин сурһульчнр гиичд дуудв. Күүкд-көвүд цергчд эврән кесн наадһас, зургуд зурад белглв. Нег наадһаг эн бийдән үлдәһәд, машиһәд кеерүлв, наадксинь үүрмүдтән күргҗ өгв. Гертәсн холд йовх залуст бичкдүдин белгүд зүркинь байрлулҗ, чидл урһасн болв.
Төрскән харсачин Өдрин болн Цаһан Сарин байрин өмн өргнд Буван Баатрт болн цергә даалһвр күцәҗ йовдг нег һазра улст Луганск Улсин Республикин Антрацит балһснд нер һарсн «Өөрднр» бииһин театрин концерт болх гиҗ зәңглв. Баатр Анатольевич энүг соңсад, хойр дам байрлв. Тернь учрта, Толя көвүнь театрин биич болна. Тегәд эн кесгәс нааран үзәд уга көвүтәһән харһхв, гиҗ теңкән уга байрлад, концертд эрк биш одхар шиидв. Антрацит балһснд ирәд, сойлын Герт отхн көвүтәһән харһсан дәкн-дәкҗ тодлҗ, тер байрта өдр уханасм һархш гинә.
Буван Анатолий «Өөрднр» бииһин театрин медлд үүлддг «Теңгрин ки» студьд урднь ордг бәәсмн. Ода эн Чонкуша Петрин нертә билг-эрдмин колледжд сурн бәәҗ театрт биилҗәнә. Бииһин театр ЛНР-ин болн ДНР-ин балһсдт дару-дарунь одад, бәәрн улсиг хальмг улсин сойлла таньлдулна. Одахн театрин артистнрт, тер тоод Буван Анатолийд «Фронтд дөң күргсн төлә» гидг медаль бәрүлҗ өгв. Көвүнә ачлвр эцкиннь төлә ик бахмҗ үүдәв. Бийнь эн цергә даалһвран цаарандан үнн кевәр күцәҗ, СВО төгстл дәәлдх седклән медүлв.

ДООҖАН Наталья
ЗУРГТ: Баатр болн Анатолий Буваевихн Антрацит балһснд «Өөрднрин» концертд харһсн кем