Чинртә мөрәһәр ачлгдв

Мөрн сарин 9-д Москван «Сколково» инновационн төвд малын эмчнрин нарт-делкән XXXIII хург болв. Терүнә йовудт кесг халхар «Золотой скальпель» мөрәһәр ирлцңгү мергҗлтнр ачлгдв. Эдн дунд Хальмг Таңһчин хойр элч заагдснь ик байр-бахмҗ үүдәв. Эннь Б.Б. Городовиковин нертә Хальмг ик сурһулин багш Һәрән Хоңһр болн Ик Буурла района малын эмч Анатолий Минаев (зургт) болв.

Ик Буурла РСББЖ-н ах эмч Анатолий Минаев дөчн һар җилдән эрдмәрн көдлҗәнә. Эн Городовиковск района Южный селәнд өсч-босад, Башантан селәнә эдл-ахун техникум төгсәв. 1982 җилд Ик Буурла Хомутниковский селәнд күч-көлснә хаалһан эклв.
Мана таңһчд мал өсклһн селәнә эдл-ахун һоллгч халхнь болна, КФХ-син болн ЛПХ-син һардачнр асрҗадг малан даңгин шинҗлх зөвтә болна. Олн җилмүдин туршарт Ик Буурла эдл-ахуст Анатолий Павлович нөкд болҗ, района фермермүдлә өөрхнәр залһлдҗ, ветеринарн керг-үүлдврмүдиг цаг-болзгнь күцәнә. Иим көдлмшин ашт сүл җилмүдт Ик Буурла эдл-ахуст малын дунд хальдврта гем илдкгдсн уга, гиҗ темдглх кергтә. Тер мет Анатолий Минаев ветеринарн халхар олн дегтрмүд умшад, номин керг-үүлдврмүдәр даңгин соньмсад, көдлмштән олзлхар шунна. 2016 җилд малыг шүлкә гемәс хөрлһнә көдлмшт эн орлцв. 2023 җилд болхла, шовудын грипп түгҗәсн цагт ирлцңгү керг-үүлдврмүд давулснь бас темдгтә.
Эндр энүнә көдлмшин медлд бәәдг крестьянск-фермерск 17 эдл-ахуд тавн миңһн толһа бод мал болн 8500 хөн асргдҗана. Ик Буурла района бүрдәцсин көдләчнрин дунд Анатолий Павлович ик медрлтә, дамшлтта, тоомсрта мергҗлт болҗ тоолгдна. Дөчн һар җилин туршарт энүнә һардврт малын баахн кедү эмчнр дамшлтан хоршасн болх, гиҗ ухалнач... Баһ цагасн авн седклән тәвҗ көдлҗәхинь онц темдглҗ, шидр өөдән чинртә мөрә бәрүлҗ өгснь байрта йовдл мөн. Урднь Анатолий Минаев Әрәсән селәнә эдл-ахун Министерствин Ханлтын бичгәр, Хальмг Таңһчин ветеринарн заллтын Күндллһнә һашгар болн талдан олн ачлврмудар темдглгдсн билә.
Анатолий Павлович Любовь Петровна авальтаһан хамдан хойр үрән өскәд, чик сурһмҗ өгв. Сул цагтан герин эзн заһс бәрҗ аңһучлхдан дурта. «Золотой скальпель» мөрәһәр ачлгдсн Анатолий Минаевиг әрүн седкләсн йөрәҗ, цааранднь чигн эрүл-менд бәәҗ, көдлмшән даавртаһар күцәҗ, отг-әәмгтән үлгүр-үзмҗ болҗ йовхинь дурдҗанавидн.

КАРСАНА Евгения