Селәнә улсин төрмүдиг хаһлхар

Хальмгин селәнә эдл-ахун министерствин ул деер бүрдәгдсн талвңд АПК-н, йиртмҗин көрң хадһллһна болн хог-бог зөөҗ һарһлһна төрмүд босхгдв.

Йиртмҗин көрңгин болн эргндк бәәдл харлһна министрин үүл дааҗадг Каминә Юрий керг-үүлдвриг секч, хог-богин нәрн төрин тускар келв. Кесг селәдт хог-бог арвад җилмүдин туршарт овалгдад, муниципалитетмүд эврә арһ-чидләрн ирлцңгү төриг хаһлҗ чадҗахш. Селәдин толһачнрла күүндәд, заканла ирлцҗ, хог-богин төр хаһлх арһ хәәхмн, – гиҗ Юрий Борисович темдглв.
Тер мет нәрн төрмүд хаһллһнд шаңһа төв туслҗана. Энүнә дөң-тусар таңһчд овалгдсн хог-богин һурвн орм уга кегдв. Ода болхла дәкәд хойр ормд дигтә-дарата бәәдл тогтагдхмн гиҗ харһлтд келгдв. Терүнәс нань усна төрәр бас күүндвр болв.
Селәнә эдл-ахун министрин үүл дааҗадг Гаван Тимур болхла өдгә цагт күцәгдҗәдг көтлврмүдин болн АПК-н халхар йилһҗ өгдг шаңһа демин тускар тодрхаһар келҗ өгв.
– Сүл җилмүдт мана таңһчд «Селән һазрин делгрлт» шаңһа көтлвр сән йовудтаһар күцәгдҗәнә. 2022 җиләс авн 2024 җил күртл инженерн, социальн, көлгнә таал ясруллһна 9 бәәрн тосхгдв, таңһчин 20 һар селәнд болхла 14 бәәрн ясгдад, тенд сән кец-таал тогтагдв. Селәдт бәәдг улсин төлә 758, 9 дөрвлҗн метр гер тосхгдв, 9 өрк-бүл шин бүүртә болв. Тер мет 8 селәнд 63,2 дууна усна сурвлҗн, 18,1 дууна хаалһс тосхгдв, уульнцсар 5 дуунад шам орулгдв, сойлын Гер эдлврт орв, – гиҗ Гаван Тимур тодлулв.
Таңһчин делгрлтиг теткҗәдг эв-арһс цаарандан йилһгдәд бәәхмн. Нег үлү селән һазрт сән кец-таал тогталһнд урдк кевәрн онц оньг өггдҗәнә. Эн җилд болхла «Селән һазрин делгрлт» шаңһа көтлвр күцәлһнә йовудт Октябрьск районд спортын төв, бичкдүдин талвң тосхлһнд болн Интернет оруллһна халхар 140 сай шаху арслң йилһҗ өггдх болв.
«Хальмг Таңһчин муниципальн бүрдәцсин хүүвин» негдлтин күцәгч һардач, Целинн РМО-н толһач Опин Эрднин темдглсәр, таңһчин селәдин толһачнриг үүмүлҗәдг төрмүдәр ирлцңгү бүрдәцсин һардачнр тодрха цәәлһвр өгч чадв. Селәнә эдл-ахун халхар шаңһас йилһдг демин мөңг авлһна төр бас босхгдв. Нег һазра фермермүд шаңһа демиг олзлхар шунна. Иим харһлтс даңгин давулгдад, муниципалитетмүдиг үүмүлҗәдг төрмүд олна күчәр хаһлгдхмн гив.

КАРСАНА Евгения