Баһ наста арһлачнриг дөңнәд

«Негдсн Әрәсә» партин дөңнлһнә олна штабин ул деер нег һазра арһлачнр цуглрҗ соньн күүндврт орлцв. «Опора России» баһ болн дунд бизнес дөңнлһнә Цугәрәсән олна бүрдәц энүг давулв.

Харһлтын йовудт арһлачнр эврәннь кергән яһҗ эклсән болн цааранднь делгрүлснә тускар келҗ өгв.
Креативн индустрийин комитетин ахлач Эрнцнә Эльза өдгә цагт нег һазра арһлачнр нурһлҗдан ямр халхар кергән бүрдәснә тускар цәәлһҗ келв. Тер мет баахн арһлач Мамута Карина эврәннь кергән яһҗ бүрдәсән тодрхаһар цәәлһв. Эрдмәрн эн хувцна дизайнер болна. Кесг җил хооран Карина күүкд улсин хувцна лавк секв. Көдлмшин йовудт ямр харшлт учрсинь медүлв. Хам-хоша бәәдг балһсдт арһлачнрин төлә бүрдәгддг керг-үүлдврмүдт эн даңгин орлцад, дамшлт хоршав.
«Альфа Банкин» элч Анастасия Запороцкая эндр эднә бүрдәц арһлачнрт ямр дөңгән күргдгинь келв. Эднә төлә онц зөвтә кредитн мөңг йилһҗ өглһнә тускар эн зәңглв.
Темдглхд, керг-үүлдврин йовудт «Опора России» Цугәрәсән олна бүрдәцин әңгин күцәгч һардач Насуна Зүнһар болн СВО-д орлцачнриг дөңндг «Төрскән харсачнр» саңгин региональн әңгин һардач, Улсин Хуралын (Парламентин) депутат Хаалһин Очр нөкцлтин халхар бооца батлв (зургт). Энүнә йовудт нег һазра цергчнр социальн, медицинск, психологическ дөң авч чадхмн, терүнәс нань СВО-н ветеранмуд сурһуль-эрдмин көтлврмүдт орлцхмн.
Харһлтын чилгчәр арһлач Станислав Уткин болн психолог Лариса Панарина шишлң медрлин халхар тренинг давулв. Нег һазра арһлачнр терүнд шунмһаһар орлцв. «Күцәмҗтә хаалһ: шин комитетмүд болн хамцу седвәр» гиҗ эн харһлт нерәдгдв.

ОЛЬДАН Цаһан