Шимтә хот белдәд

Давсн амрлһна өдрмүдт Элстд бамб цецгин наадмин йовудт тогтсн авъясар МаханФест керг-үүлдвр болв. Җил болһн энүг Хальмг Таңһчин экономикин болн хулд-гүүлгәнә министерств, «Мини бизнес» төв бүрдәнә. Соньн керг-үүлдврин йовудт нег һазра арһлачнр кеҗ һарһсн эдл-уушар, махна зүүтә олн зүсн хотар олн-әмтиг тоов.
Эн җил намртан болх шар шаҗна нарт-делкән III хург угтҗ, ахнр-дүүнр болҗадг Бурятин Республикәс болн Моңһлас шишлң үрврәр замачнр ирв. Баир Менжиков, Михаил Шарапов болн Батцэнгэл Тумэндэмбэрэл ахта һуйрас болн махнас «Цуйван» нертә нүүдлин улсин хот кеҗ һарһв. Энүг хулдад, олсн мөңгн цергә шишлң керг-үүлдврт орлцачнрт йовулгдх болв. Келхд, цуйван хальмгуд эдлдг хуурсн махнла әдл болв. Темдглхәс, эн хот кеҗ һарһхин төлә нег һазра арһлач, «Экостепь» бүрдәцин һардач Эрнҗәнә Баатар хөөнә мах йилһҗ өгв.
Шишлң үрврәр ирсн һурвн замач Москва балһсна «Сансар» ресторанд көдлнә. Тиигәрән нүүдл улсин хотд дурта әмтн олар ирнә. Келхәс, олн-әмтн дунд эн ресторан ик тааслт олсинь заах кергтә. Тенд хөөнә, мөрнә махнас шимтә хот белднә. Тер мет заһсна зүүтә хот бас кенә. Москвад көдлҗәдг болн тенд сурһуль сурчадг ахнр-дүүнр болҗадг республикүдин элчнр тиигәрән ирәд, шимтә хот эдлдгчн.
Хойрдгч өдртнь бас соньн керг-үүлдврмүд давулгдв. Хальмгин замачнр олн-зүсн хотан чанад, шишлң марһанд орлцв. Хурһна хавсн, бөөрг болн әмтәхн хот тедн белдв. Тер мет таңһчин гиичнрт боорцг яһҗ кедгинь энд үзүлв. Тер өдр дәкәд соньн нег марһан болв. Элстихн, ирсн олн зуульчнр болн гиичнр кен хамгин дала бөөрг барҗ идәд болн кесг ааһ цә ууҗ чадхинь сөрҗ марһлдв.
Марһана ашар Элст балһсна «Октябрь», «Марко Поло», «Этно-Хауз» һурвн кафен, Яшкулин района «Уралан», Лаганя района «Стадион», Үстин района «Калмыцкая кухня» кафесин замачнр ончрсн болдг. Цуһар дипломсар болн үнтә белгүдәр ачлгдв.
Терүнәс нань нег һазра мана арһлачнр кеҗ һарһсн эд-тавран, олн зүсн белгүдән хулдв. Таңһчин нертә коллективс билг-эрдмәрн олн-әмтиг байрлулв. Спортын кесг марһас бас болв. Бичкдүдин төлә наадна талвң бүрдәгдв. Кесгнь мөр болн темә унад йовв.
ОЛЬДАН Цаһан