Госпитальд цергчнрт дөң күргх

Шидр мана таңһчур Әрәсән Федерацин Хүүвин Ахлачин дарук Инна Святенко көдлмшин халхар ирәд, таңһчин эмнлһсин үүлдврлә таньлдад, тенд эрүл-мендән батрулҗадг цергә шишлң керг-үүлдврт орлцачнрла күүндсн билә. П.Жемчуевин нертә таңһчин эмнлһнә ах эмч Чумпинә Саглр реабилитацин әңгин үүлдврин тускар келв, ямаран кергсл бәәхиг үзүлв. Балһсна поликлиникин ах эмч Нәәмнә Бембән келсәр, энд реабилитацин кергсл углҗ тәвгдсн бәәнә, зәрмнь Троицкое селәнә әңгд бәәнә, тегәд цергә керг-үүлдврин ветеранмуд цогц-махмудан батрулхин төлә таал бәәнә.
- Тана эмнлһст көдлдг эрүл-менд харлһна көдләчнр цергч болһнд килмҗән тусхаҗ, цаһан седкләсн теднә эрүл-менд батруллһна кергт дөңгән күргҗәхиг темдглх кергтә. Эмнлһнд бәәдг цергчнр эрүл-менд харлһна көдләчнрин тускар бүләнәр келҗ, эднә көдлмшиг өөдәнәр үнлҗәхинь терүг иткүлнә. Цергч болһна эмнлһнә керг-үүлдвр дигтә-даратаһар бүрдәгдсиг үзүв, эднлә психологуд болн реабилитологуд бас көдлҗ дөңгән күргҗәнә. Шарх-шаван эдгәснә хөөн кесгнь хәрү цергә даалһвран күцәхәр седҗәнә. Зәрмнь эрдмәрн көдлхәр бәәнә эс гиҗ шин эрдм дасхар зуралҗана. Цергчнриг дөңнлһнә керг өөдән кемҗәнд бүрдәгдснь таңһчин залврин болн таңһчин Толһачин ач-тус болҗана, - гиҗ Инна Юрьевна темдглв.
Таңһчин эрүл-менд харлһна төрәр болсн селвлцәнә хөөн Хальмг Таңһчин Толһач Хаска Бату олнд зәңгллһнә эв-арһсин көдләчнрин сурврмудт хәрү өгәд, Элстд тосхгдҗадг ветеранмудын госпиталин тускар онц келв. «Мана таңһчд гериатрийин болн реабилитацин төвлә зерглҗ ветеранмудын госпиталь тосхх арһ учрснд бидн байрта бәәнәвидн. Терүнә тосхлт орн-нутгин һардврин дөң-тусар күцәгдҗәнә. Иим госпиталь тосхлһн энтн Әрәсән Президентин шиидвр болн даалһвр бәәсмн. Эндр госпиталин бәәрн тосхгдв, ода дотрк көдлмш кегдҗәнә, кергтә кергсл хулдҗ авгдҗана. Эн җил ик чинр зүүҗәдг эмнлһн эрк биш эдлврт орулгдх. Мана таңһч талдан регионмудын цергчнрт дөң күргҗ, энд эмнлһ авхд цуг таал тогтахмн. Маднд ирлцңгү мергҗлтнр бәәнә, эдн эрдмдән итклтә улс мөн. Тегәд бидн нег һазра мана цергчнрлә зерглҗ талдан регионмудын ветеранмудыг дөңнхвидн», гиҗ Бату Сергеевич келв.
БАТАН Сәәхлә