Көдлмшәр теткхин төлә

Шидр Элстд көдлмшч ормсин Цугәрәсән яармин региона девсң болв. Һурвн җил дарандан болҗадг керг-үүлдврт 60 бүрдәц орлцад, көдлмш хәәҗәдг улст 500 шаху орм бәәхин тускар зәңглв. «Кадры» гидг келн-улсин төсвин медлд бүрдәгдсн керг-үүлдврин йовудт таңһчд көдлмш олҗ авсн деерән талдан регионмудт ямаран эрдмтә улс кергтә болҗахиг медҗ болхмн билә. Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина керг-үүлдвриг нүр үгәр секәд, сурһульчнрт иргчдән эрдм шүүҗ авхд, сурһулян төгсәҗәдг баһчудт болн көдлмш хәәҗәдг улст яарм тааста керг олҗ авхд дөң болхиг темдглв.
- Мана таңһчд көдлмшәр тетклһнә цергллтсин саңд 1500 көдлмшч орм бәәнә. Цергллтд ирсн күн болһнд мергҗлтнр тааста эрдмәрнь көдлмш олҗ авхд, немр сурһуль сурхд дөң күргнә. Ода мана таңһчд өлг-эд кедг, хувц уйдг бүрдәцс секгдҗәнә, зуульчллһн делгрҗәнә, тегәд көдлмшч болн олн зүсн туслмҗ күргдг эрдмтә улс кергтә. Үлгүрнь, «Модн» гидг хувц уйдг фабрик секгдв, терүнд уячнр керглгдҗәнә. Цергә шишлң керг-үүлдврт орлцачнриг бидн дөңнҗ, эднд көдлмш олҗ авхд, шин эрдм дасхд, социальн бооца батлҗ эврә керг бүтәхд дөң болнавидн. Эндрк яармд орлцҗадг 60 бүрдәц эврәннь үүлдврин тускар келҗ, ямаран көдләчнр кергтәг цәәлһҗ өгхмн. Эн керг-үүлдвр таңһчин бүрдәцст болн көдлмш хәәҗәдг улст туста болтха, - гиҗ Өлзәтин Марина дурдв.
«Эв-арһин цаг» гиҗ нерәдгдсн керг-үүлдврт хотл балһсна дунд сурһулин ах классмудын сурһульчнрин төлә дунд шишлң сурһуль-эрдмин 7 бүрдәц үүлдвриннь туск һәәхүл белдәд, ямаран эрдм эдн дасдгин тускар келҗ өгв. «Модн» фабрикин, «Интерстрой» ООО-н, «Улан Хөөч» селәнә эдл-ахун бүрдәцин, УФСИН-ә, УФССП-н, дотр-дундын кергүдин министерствин, «Яшкулин ДУ», «Водоканал» муниципальн бүрдәцсин элчнр көдлмш хәәҗәдг улсла күүндв. «Модн» фабрикин элч Байр Максимовин келсәр, Элстд эднә фабрикд 30 күн көдлҗәнә, эдн дәкәд 50 күүг көдлмшт авх саната. Көдләчнрин җалв 60-100 миңһн арслң тогтана. Эднд инженермүд, уячнр болн талдан эрдмтә улс кергтә. Ода фабрикд цергә керг-үүлдврин хойр ветеран көдлҗәнә. Келхд, фабрик «Төрскән харсачнр» гидг саңла нөкцҗ хамдан үүлднә. Фабрикд өдгә цага кергсл углҗ тәвгдсн бәәнә, тегәд залу улс чигн уячар көдлнә.
«Улан Хөөч» селәнә эдл-ахун бүрдәцин көдләч Мукөвүнә Эльвиран келсәр, эднд җолачнр, механизатормуд, күч-көлс харлһна мергҗлт болн юрист кергтә. Эдл-ахун элчнр җил болһн көдлмшч ормсин яармд орлцна. Эдл-ахун көдләчнр җалв авсн деерән даалһвран үнн кевәр болн давулҗ күцәсн цагтан мөрә авна. Дәкәд көдләчнрән урмдулхин төлә эдл-ахун һардвр хурһд өгнә. Ода эдл-ахуд төл авлһна кем давҗана, дарунь хөд кирһлһн эклхмн, тегәд немр көдләчнр бас кергтә.
Яармин медлд «Эрдмин наадм» болв, психологуд көдлв. 2024 җилд болсн яармд 1500 күн орлцсн билә, аштнь 175 күн көдлмш олҗ авв. Эн җил болсн керг-үүлдврин ашт бас кесгнь тааста эрдмәр көдлмш олҗ авх гисн ицл бәәнә.
ДАВАН Наталья
ЗУРГТ: көдлмшч ормсин яармин кем