Цусан өгдг улсиг хамцулҗ

Җил болһн мөрн сарин 20-д мана орн-нутгт эврә сән дурар цусан өгдг улсин төлә Келн-улсин өдр болна. Цусан өгч әм аврдг улст, цус авдг бүрдәцсин көдләчнрт нерәдҗ эн өдр зарлсмн. Әрәсәд җил болһн ут тоодан күсдундур сай күн цус керглнә. Зеткртә йовдлд шав авсн, күнд гемәр гемтсн, цаһан төр болсн, бачм бәәдлд көдлсн улст цусн кергтә болна.
Эн өдр мана орн-нутгт донормудт нерәдгдсн керг-үүлдврмүд бүрдәгднә. Эн җил Әрәсән ФМБА «Импакт» гидг буйнч седклин болн социальн седвәриг дөңнлһнә саңла хамдан «Җирһлин һал» гидг керг-үүлдвр бүрдәв. Цугәрәсән керг-үүлдврин нег девсңгнь Элст балһснд бас болв. Әрәсән Орн-нутгин Хүүвин эрүл-менд харлһна комитетин ахлачин негдгч дарук, «Негдсн Әрәсә» партин «Эрүл-менд иргч» төсвин зүүцүләч Башанкан Бадм болн Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина керг-үүлдвриг секәд, эврә сән дурар цусан өглһнә керг ик чинртә болдгиг темдглв. Бадм Николаевич «Җирһлин һал» гидг керг-үүлдврт орлцхар ирсн Артем Алискеровд һал бәрүлҗ өгв. Дарунь ирлцңгү кергт орлцачнр Мөңк һалын бумблвас экләд балһсна төв күртл һартан һал бәрҗ гүүв. Йосна бүрдәцсин элчнр, нертә спортсменмүд, ачта донормуд, цергә шишлң керг-үүлдврин ветеранмуд болн эврә сән дурар үүлддг улс эн керг-үүлдврт орлцв.
БАТАН Сәәхлә