Ончта өөнләнь йөрәв

Шидр Хальмг Таңһчин күндтә иргн, Аһш балһсна «Хальмг Таңһч-Аһш» олна бүрдәцин ахлач Геннадий Кошелев 80 җилин өөнән темдглв. Хөрн тавн һар җилдән Геннадий Михайлович Аһшин мүҗд мана таңһчиг элчлҗәнә.
Энүнә чадмһа көдлмшин һардврт Аһшин мүҗд Хальмгин хәәртә үрдин нерд мөңкрүлгдв. Тедн дунд Советин Союзин Баатр Санҗра Николайин, Социалистическ Күч-көлснә түрүн Баатр Буваша Санчурин болн талдан нерд заах кергтә. Геннадий Кошелевин нилчәр Аһш балһсна уульнцс Калмыцкая, Элистинская, Һәрә Хохоловин болн Геннадий Лячинә нерд зүүдг болв.
Тер мет Мамаев өөдмд Сталинградын дәәлдәнд орлцсн хальмгудын нерд бас мөңкрүлгдсн билә. Терүнәс нань Светлоярск района Солянка селәнд гегән-герлин суврһн босхгдв.
Аһшин мүҗд тууҗин-сойлын болн талдан халхар давулгддг керг-үүлдврмүдт Геннадий Михайлович шунмһаһар орлцна, гиҗ онц темдглх кергтә. Келн-улсин хоорндк хәрлцә батллһнд тәвцән орулҗахинь бас үнлхмн.
Геннадий Кошелевин ач-тусинь темдглҗ болн ончта өөнлә ирлцүләд, Хальмг Таңһчин Толһач Хаска Бату Ханлтын бичгән илгәҗ йөрәв. Таңһчин Улсин Хуралд (Парламентд) Хальмгин Толһачин элч Манҗин Араш Аһш балһснд одад, Геннадий Михайловичд ханлтан өргҗ белгән белглв (зургт).

БАДМИН Занда