Олн җилдән саальчар көдлв

Вчера, 15:13 | Общество

Советин Союзин цагт селән һазрт бәәдг улс дунд малчин, механизаторин болн саальчин эрдм хамгин күндтә бәәснь ода тодлгдна. «Мал асрхла амн тоста» гиҗ хара келчксн үгмүд биш. Ик кезәнәс авн мана өвкнр малын ард теегт йовад, сән төл авч йовсмн. Өдртән теегт идшлсн үкрмүд асхнднь кесг суулһ үс өгдмн.

1953 җилд Новосибирск мүҗин Болотное балһснд тууврт бәәсн хальмгудын Чуда Эрдниевич болн Любовь Гюнзиковна Мучкаевихнә өрк-бүлд Антонина күүкн һарв. 1956-1957 җилмүдт хальмгудын нер цеврлгдәд, мана аавнр-ээҗнр хәрү төрскн һазртан ирх зөв авсмн. Арвн һурвн җилдән күүнә һазрт бәәсн хальмгуд таңһчан босххар шунв.
Эндр Антонина Чудеевнан тодлврар, тууврин өмн эднә өрк-бүл Ярта хотнд бәәсмн. Хальмгуд Сиврүр туугдсна хөөн эн хотн тарв. Тәвдгч җилмүдт нааран ирхлә, нег чигн гер уга болад, Антонина Чудеевнан аавнь Хар Булгт ирҗ бәәршлхәр шиидв. Тер цагт энд усн элвгәр бәәдг төләд кесгнь энд бууһад, герән тосхад, көдләд, үрдән өскв.
Антонина ардан зурһан дү күүк болн хойр дү көвү дахулв. Өнр-өсклң Мучкаевихнә өрк-бүлд цуһар ниитә, нег-негән бичкнәсн авн хәләһәд, нөкд болад, олн-әмтнд үлгүр болад өсв.
Арвн нәәмтәдән Муучкан Антонина Башкирәс мана таңһчд көдлхәр ирсн Флюр Иждавлетовла таньлдв. Баһчуд нег-негндән дуран өгәд үүрлдг болв. Флюр Валиевич эврә нутгтан ик сурһуль төгсәсмн, тер цагт баахн мергҗлтнриг цуг орн-нутгар көдлмшт йовулдг бәәсмн. Тегәд эн Хальмг Таңһчд ирәд, хөвән олв. Келхәс, энүнә аавнь дәәнә цагт хальмг теегт дәәлдҗ йовсн бәәҗ. Тегәд аавасн хальмгуд сән келн-улс болдгинь медҗ.
1973 җилд Флюр Антонина хойр өрк-бүлән өндәлһв. Эдн хамдан Хар Булгтан көдлдг болв. 1976 җилд Антонина хошт көдләд күч-көлснә хаалһан эклв, хөөннь саальчар көдлв. Тер цагт мана у-өргн теегт малын тонь зөвәр ик, селән болһнд саалин үкрмүд бәрдг бүкл бүрдәцс күцәмҗтәһәр көдлдг билә. Бүрдәц болһн зураһан даңгин күцәдмн. Антонина Чудеевна һарарн үкр саадг билә, хөөннь ирлцңгү кергсл олзлдг болв. Флюр Валиевич болхла, бас селәнә эдл-ахун халхар җолачар, хөөннь ачта амрлһндан һартлан механизаторар көдлсмн.
Келхәс, Антонина Чудеевнан экнь бас олн җилдән үнн-чик седклтәһәр саальчар көдләд, күндллһнә кесг темдгүдәр, туурмҗин орденәр ачлгдсн билә. Антонина болхла, экиннь үлгүрәр бас саальч болв. Олн җилдән седклән тәвәд көдлсн төләдән саалин эрдмч болв. Көдлмшән даавртаһар күцәсн деерән, Антонина Чудеевна селәнә бәәдл-җирһлд бас шунмһаһар орлцдг билә. Тер мет селәнә болн района хүүвин депутатд кесг дәкҗ суңһгдсн мөн.
Эндр Антонина Иждавлетова ачта амрлһндан бәәнә. Москвад бәәдг күүкндән болн зеедән золһад, тедндән нөкд болна. Һундл төрхд, Флюр Валиевич һурвн җил хооран бурхн болв. Антонина Чудеевна болхла авалиннь санл тевчәд, зуни кемд зе күүкән дахулад Башкирьт бәәдг элгн-саднднь күрч мендинь меднә.

КАРСАНА Евгения
Зургт: Зүн таласнь хойрдгчнь:
саальч Антонина Иждавлетова

Видео