Келн-улсин негдлтин төрмүдәр

Эн өдрмүдт Ханты-Мансийск Автономн Округд Келн-улсин негдлтин Цугәрәсән VI хург болв. Энүнә йовудт Әрәсән келн-улсин Герин болн орн-нутгин келн-улсин Ассамблейин хамцу үүлдвр бүрдәгдв.
«Әрәсән Федерацд келн-улсин политик күцәлһнд ниигмин чинр» төрәр эн керг-үүлдвр болв. Әрәсән келн-улсин Ассамблейин делегацин ханьд орн-нутгин регионмудын әңгүдин һардачнр орлцв. Ирлцңгү әңгин һардач, «Хальмг үннә» ах редактор Бембин Евгений Хальмг Таңһчиг элчлв.
Шидр Евгений Владимирович Әрәсән келн-улсин Ассамблейин һардачин дарук Назиржон Абдуганиевла хамдан «Югра» телеүзлин хургт нерәдсн соңсхврт орлцв. Терүнә йовудт хургт босхгдсн төрмүдәр күүндвр болв. Тер мет телеүзлин седкүлчнрин сурврар Бембин Евгений «Югра» үгиг тод бичгәр бичәд белглв.
Регионмудт үүлдҗәдг Ассамблейин әңгүдт мана орн-нутгт бәәдг олн келн-улсин элчнр көдлҗәхинь темдглх кергтә. Тедн цуһар келн-улсин хоорндк хәрлцә батруллһнд тәвцән орулҗана.
ОЛЬДАН Цаһан