Ах үйин улсин ач-тусинь темдгләд

Шидр Хальмг Таңһчин Улсин Хуралын (Парламентин) дарани биш сессь болв. Таңһчин Улсин Хуралын Ахлач Артем Михайлов сүүриг һардҗ давулв. Таңһчд ах федеральн инспектор Александр Беляев, Хальмг Таңһчин залврин Ахлач Босхмҗин Гилән, таңһчин Улсин Хуралд Хальмг Таңһчин Толһачин элч Манҗин Араш, зөв-йос харлһна, зарһин болн бүртклһнә бүрдәцсин, олна ниицәсин элчнр сессин көдлмшт орлцв. Эн сессьт ут тоодан долан төр хәләгдв, тедн дунд ик чинртә закадын төсвсин туст өргн күүндвр болв.
Тиигәд, таңһчин залвр белдсн закана төсвәр зәрм иргнмүдт күргдг социальн дөңгин онц зөв сольгдв. Алдр Диилврин өөн угтҗ болн Төрскән харсачин җиллә ирлцүләд, цааҗла харһсн болн тылд көдлсн улст, күч-көлснә ветеранмудт болн дәәнә цагт һарсн бичкдүдт социальн дөң күрглһнә туск заканд сольвр орулгдсна ашт эднд сар болһн өгдг демин мөңгнә кемҗән икдүлгдв. Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан келсәр, ода мана таңһчд эн демин мөңг авдг 26,5 миңһн күн бәәнә. Цааҗла харһсн, күч-көлснә ветеранмудт урднь хаалһин һару даңцалһнд сардан 327 арслң өгдг бәәсмн, хөн сарин 1-әс авн тернь 500 арслң болхмн. Дәәнә цагт һарсн бичкдүдт сар болһн 655 арслң өгдг бәәсн болхла, ода 1000 арслң өгхмн. Таңһчин заканд сольвр орулсна хөөн эн деер заагдсн улст демин мөңг өглһнд 44 сай арслң керглгдхмн. Социальн дөңгин туск заканд сольвр орулсна ашт таңһчин хазна һаруһин әңгд бас сольвр орулгдхмн.
Депутатнр таңһчин закана төсвиг нег дууһар дөңнәд, дәәнә цагт һарсн бичкдүдт, цааҗла харһсн, тылд көдлсн улст болн күч-көлснә ветеранмудт өгдг социальн демин мөңг икдүллһнә төриг әмтн харһлт болһнд босхна гиҗ темдглв. Алдр Диилврин өөнин өмн өргнд иим зака батлснь ик чинртә, таңһчин залвр эн закана төсв белдснд ханлтан өргҗәнәвидн, гиҗ депутатнр келв. «Мана таңһчин хазна һаруһин әңг социальн чинр зүүнә. Нег үлү Төрскән харсачин җилд зәрм иргнмүдиг дөңнлһнә керг-үүлдврмүдт таңһчин залвр ик оньг тусхаҗана. Мана таңһч оруһан 30 процентд икдүләд, Өмн үзгин регионмуд дунд нүүрт һарв, орн-нутгт болхла, арвн иим региона тоод орв. Алдр Диилврин өөн угтҗ, таңһчин заканд сольвр орулснь бас чинртә, мана медәтнрин төлә хөн сарас авн демин мөңгн икдхмн», - гиҗ Хальмг Таңһчин залврин Ахлач Босхмҗин Гилән келв.
Таңһчин селәнә эдл-ахусиг дөңнлһнә туст бәәрн залврин бүрдәцст шаңһа онц зөв өглһнә, бәәрн залврин бүрдәцст суңһвр давуллһна туск таңһчин закадын төсвс эн сессьт бас батлгдв. Тиигәд, ода шаңһас дем авчадг селәнә эдл-ахус, тер тоод крестьянск-фермерск эдл-ахус өдгә цага эв-арһс олзлҗ, эрлһән орулҗ чадхмн. Урднь болхла эдн кесг цаас цуглулҗ бәәрн залврин бүрдәцст болн таңһчин селәнә эдл-ахун министерствд күргҗ өгх зөвтә бәәсмн. Ода цугнь амрар кегдхмн. Эн сессьт таңһчин бичкдүдин болн арһлачнрин зөв харсдг элчнр Чужан Наталья болн Эрднь-Һәрән Оксана 2024 җилд кеҗ-күцәсн көдлмшин тооцаһан өгв. Депутатнр эднә үүлдврин халхар кесг сурвр өгәд, белдсн тооцаг батлв.
ДООҖАН Наталья