Цаһан Дәркин көшә босхгдв

Нижний Новгород балһснд Цаһан Дәркин ик көшә босхгдсна тускар «Нижний Новгород» гидг зәңгсин агентств зәңгллә. Эн бумб Максим Горькийин нертә уульнцд дүңгәҗ босв. Өндртән һурвн метр Цаһан Дәркин бумбиг мөрн сарин эклцәр байрин бәәдлд секв. Өр-өвч седклтә, цуг әмтә тоотыг харсчах бурхна дүр эн ик балһсна оюни җирһлд чинртә йовдл болв. Бурхна бумб секлһнд ирсн әмтн мандл нерәдҗ тосхлһна йосрхлд орлцад, амулң җирһлин төлә зальврв. Бурхн-шаҗна төвд цуг әрүн тоотыг эдн эргҗ хәләв. Үстә цәәһәр тоогдад, әмтн седкл таварн хәрв.
Ока һолын өндр эрг деер дүңгәҗ боссн Цаһан Дәркин бумб ик холас үзгднә. Эн балһснд үүлддг бурхн-шаҗна ниицәнә тоолврар, Цаһан Дәркин бумб балһсна әмтн болн олн зуульчнр дурлҗ ирдг орм болхнь маһд уга.
УШКАНА Сувсн