Шүлгчнрин күцәмҗ

Хаврин сармудт олн керг-үүлдвр орн-нутгт, тер дотр мана таңһчд болна. Хальмг бичәчнр терүнд орлцхар зүткнә. Таңһчд болҗадг урн үгин үүлдврлә залһлдата олн йовдлмудт бичәчнр даңгин орлцна. «Тагчг бәәшго нег агчм, бидн – моһлцг һазрин үрд» гиҗ тернь нерәдгдлә. Эн ик чинртә йовдлын тускар Әрәсән бичәчнрин ниицәнә Хальмгин әңгин гешүн, бичәч Ользан Елена мана седкүлчд келҗ өгв.

Цуг делкән бичәчнрин «WOW» ниицән Евразин болн Африкин келн-улсин Ассоциацла хамдан ик чинртә керг-үүлдвр бүрдәв.
2025 җилин моһа сард Москвад бичәчнрин төв герт болсн шүлгләнә XXVI делкән өдрин кемҗәнд күцәгдсн эн керг-үүлдвр кемҗәһәрн зөвәр ик болв.
Әвртә эн үүлдврт 300 күн орлцҗ, хамдан 100 шүлг умшв. Эвин тускар моһлцг һазр деер бәәдг олн келн-улсин шүлгүд эн өдр күңкнв. Нарт-делкәд бәәдг келн-улсин келәр соңсхгдсн шүлгүд зуг нег минутын эс гиҗ 60 секундын йовудт умшгдснь нег үлү өврмҗтә болв.
Әрәсән бичәчнрин ниицәнә гешүд, шүлгчнр Канкан Эрднин болн Ользан Еленан шүлгүд тенд соңсгдв, Манҗин Иринан болн Карун Майян шүлгүд бас умшгдв.
Хальмг шүлгчнрин үүдәврмүдиг Бачан Данир, Колдан Булһн, Адьяна Байн, Мулан Артем чееҗәр умшв. Хальмг келн-улсин хувцан өмсәд, эн баһчуд шүлгләнә байрт шунмһа кевәр орлцв. Эн кецү ик чинртә үүлдврт орлцсн шүлгчнрт болн шүлгүд умшсн баһчудт иткл цаасд бәрүлҗ өггдв. Дагнын Жиргсайхан, Пурэвжав Герелт Од, Чимид Тюмэрдэмбэрэлл эн байрт моңһл шүлгләнә айсиг орулв.
Евразин болн Африкин келн-улсин Ассамблейин һол бәәрнд моңһл болн хальмг бичәчнр Әрәсәд Моңһл элчллтин сойлын атташе, зерг Онон Чимбаярла харһҗ күүндв. Цуг делкән бичәчнрин «WOW» ниицәнә президент Маргарита Аль эн харһлтыг һардҗ давулв. Евразин болн Африкин келн-улсин Ассамблейин һардач Сергей Евгеньевич Ханутин бичәчнриг тосч йөрәлин үг келв. Хальмгин бичәчнрин нерн деерәс эн харһлтд Ользан Елена орлцв. Хамцу үүлдврин болн әмтиг негдүлгч керг-үүлдврмүдин болн төсвин тускар күүндвр болв. Тер тоод «WOW» ниицәнә II хургт белдвр келһнә төр чигн босхгдв, эннь Москвад 2025 җилин намрар болхмн гиҗ зуралгдҗана.
Хөн сарин 9-д Алдр Диилврин 80 җилин өөнд нерәдсн хураңһу барас һархмн. Мана хальмг бичәчнрин үүдәврмүд чигн терүнд орхмн.

ҖИРҺЛИН Кермн