Белдврин көдлмшт – һол оньг

Шидр Хальмг Таңһчин Улсин Хуралын (Парламентин) Ахлач Артем Михайлов Хальмгин Толһачин даалһврар Алдр Диилврин 80 җилин өөнд нерәдгдсн керг-үүлдврмүд бүрдәлһнә болн белдвр келһнә төрәр селвлцә давулв. Терүнд таңһчин күцәгч йосна, зөв-йос харлһна бүрдәцсин, Элст балһсна һардврин элчнр орлцв. Видеозалһлдана эв-арһар райодын муниципальн бүрдәцсин элчнр күүндврт бас орлцҗ, хәләгдсн төрәр тооцаһан өгв.
Селвлцәнд Алдр Диилврин ончта өөнин керг-үүлдврмүдт кегдҗәдг белдврин көдлмшин, дәәнә ветеранмудт социальн дөң күрглһнә, Яшкулин района Хулхт селәнә өөр 28-ч Әәрмин бумблвин шидр санлын митинг, Элстин ипподромд мөрнә урлда давуллһна, олна-политическ болн әәмшг уга бәәдл тетклһнә төрмүд босхгдв. Байрин керг-үүлдврмүд давулх һазрт әәмшг уга бәәдл тетклһнә төрмүдт ик оньг өггдхиг Артем Михайлов темдглв. Тер мет олн әмтн цуглрх һазрт эрүл-менд харлһна көдләчнр бәәх зөвтә гиҗ эн заав.
- 1941-1945 җилмүдт Төрскән харсгч Алдр дәәнд Диилвр бәрснә 80 җилин өөнин керг-үүлдврмүд өргмҗтә кевәр бүрдәҗ давулгдх зөвтә. Дәәнә ветеранмудт, тылд көдлсн улст бидн килмҗән тусхаҗ, күн болһна төртнь орлцҗ, ончта өөнлә йөрәх зөвтәвидн. Белдврин көдлмш гүргүдән орв, бүрдәмҗин төрмүдиг даавртаһар хаһлх кергтә, - гиҗ Артем Васильевич темдглв.