Нег һазра улс парадт орлцхмн

Шидр Элст балһсна Хургин Ахлач Максим Сорокин болн ЭГС-ин депутат Чумуда Николай Алдр Диилврин парадт орлцх нег һазра улсла Москва балһснд харһв.
- Алдр Диилврин 80 җилин ончта өөнд нерәдгдсн Улан талвңд болх парадт мана таңһчас 5 күн орлцхин тускар бахмҗтаһар зәңглҗәнәв. Эннь Элст балһсна Хургин депутат Энән Андриян болн Б.Б.Городовиковин нертә Хальмг ик сурһулин 4 оютн мөн. Чумуда Николайта эднд золһад, парадт белдвр кеҗәх цергә әңгд одвидн. Теднлә хамдан бидн мана алдр улс Ока Иванович болн Басан Бадьминович Городовиковихн болн Хальмг мөрн цергә онц 110-ч дивизин нер һарсн командир Василий Алексеевич Хомутников оршагдсн Новодевичье үкәрт одвидн. Таңһчин делгрлтд эврә цагтан ик тәвцән орулсн хальмг улсин алдр үрдин санл тевчәд, күндллһән медүлвидн. Алдр баатрмудын үлдәсн зөөриг байҗулад, төрскнч седклтә улс болҗ өстн гиҗ дорас өсч йовдг баһ үйнрт дуудвр кеҗәнәв, - гиҗ Максим Сорокин келв.
Хөн сарин 9-д Москва балһснд Улан талвңд Алдр Диилврин 80 җилин ончта өөнд нерәдгдсн парадт орлцх нег һазра мана улсиг хәләтн.