Дәәнд орлцсн бичәчнрин үүдәлтәс

Хальмг урн үгин зөөрин халхар зөвтә тәвцән орулсн кесг бичәчнр Төрскән харсгч дәәнд орлцсмн. Барин үзгән бу-селмлә хамцулҗ, Төрскнәннь төлә эдн талдан цергчнрлә хамдан дәәлдәнд боссмн. Дәәнә цагт үзсн тоот, цуг улсин хамцу күчлт, фронт болһнд цергчнр зөргтә кевәр дәәлдҗ йовсн аавнрин, эцкнрин, залусин, ахнрин, гертән үлдсн ээҗнрин, экнрин, эгчнрин, дү күүкдин унтл-кевтл уга көдлҗәсн шунлтыг, Диилврин төлә кен чигн күн чидлән, цаган әрвллго көдлҗ йовсиг үзсн, медсн бичәчнр цуг терүгән үүдәврмүдтән орулсмн. Тиигәд аврлт уга эн дәәнә һалд зөргәрн туурсн, күч-көлсәрн дөңнсн улсин дәәнә тууҗ үүдсмн.
Орн-нутгин харслтын шивә болҗ боссн әмтнә тууҗиг үүдәврмүдтән мөңкрүлсн бичәчнрин болн шүлгчнрин санлд нерәдсн концерт Элстд болв. Терүнд бичәчнр, ветеранмуд, оютнр, сурһульчнр, нань чигн улс орлцв.
Дорҗин Басңгин «Тоһрудын туск балладыг» умшҗ, санлын концерт эклв. Хальмгин билгтә бичәч Дорҗин Басң барин халхар көдлҗ йовсмн. «Хальмг үнн» газетд дааврта сегләтр болҗ барин үүлдврт тәвцән орулсмн. Бичәчнр Җимбин Андрей, Инҗин Лиҗ төрскн газетд көдлҗ йовла. Дәәнә туск кесг үүдәврмүднь газетин халхст барлгдҗ, умшачнрин оньгт тусхагдсн болдг.
Дәәнд орсн бичәчнрин болн теднә үүдәлтин тускар Хальмг ик сурһулин багш, номт, утх-зокъялын шалһач Манҗин Николай келҗ өгв.
Дәәнә һалд күчр-күнд бәәдлиг давҗ һарад, тер догшн цагиг болн әмтнә зөргиг болн теслтиг үзүлҗ чадсн шүлгчнрин үүдәврмүд ода мартгдшго зөөр болҗана, гиҗ хальмг улсин шүлгч Нуура Владимир келв.
Оютнр болн сурһульчнр Көглтин Даван, Нармин Морхаҗин, Хоньна Михаилын болн нань чигн шүлгчнрин үүдәврмүдиг умшв. Төрскнч седкл зүүлһдг дууг дууч Довдуна Нарн болн нань чигн дуучнр дуулв. Дәәнд орлцсн хальмг шүлгчнрин зургудыг үзәд, теднә үүдәврмүдиг соңсад, эндрк үйин баһчуд Төрскнд әәмшг үүдсн цагт һартан бу-селм авч дәәлдсн шүлгчнрин санлыг күндлв.
Ниитә Төрскнә төлә эн өдрмүдт СВО-н зергләнд дәәлдҗ йовсн цергчнрин тооһас бүрдсн дууна багиг әмтн альхан ташҗ тосв. Орс-хальмг келәр дуулсн дууһинь цуглрсн улс оньган өгч соңсв.
«Санлын эн керг-үүлдвриг белдхләрн, хамгин түрүнд баһчудт терүг нерәдләвидн», - гиҗ шинҗләч болн бичәч Цернә Василий келв. Эн санлын асхнд ирсн күүкд-көвүдт, теднә багшнрт ханлтан тер медүлв.
Дәәнд орлцсн бичәчнр ода мадн дунд уга, болв теднә нерд мартгдҗахш. Эврә үүдәврмүдәрн эдн төрскн урн-үгин тууҗд орв.
ҖИРҺЛИН Кермн