Сурһульчнрин төлә бүрдәсн экскурсь

Диилврин 80 җилин ончта өөн угтҗ Әрәсән 89 регионд Төрскән харсгч Алдр дәәнлә залһлдата ормсар «Экскурсь медрлтә хамдан» гидг төсв күцәгдв. Шидр Хальмг Таңһчин залврин Ахлачин дарук – таңһчин то-дигин делгрлтин министр Этән Алексей Элст балһсна 4-ч тойгта дунд сурһулин 10-ч классин сурһульчнрин төлә экскурсь давулад, Советин Союзин Баатр, олна болн политическ үүлдәч Басан Городовиковин тускар келҗ өгв.
Этән Алексей «Медрл» ниицәнлә бат залһлда бәрҗ, лектор болҗ үүлднә. Нидн эн Б.Б. Городовиковин нертә Хальмг ик сурһулин оютнрла бас экскурсь давулсн билә. Одахн болсн керг-үүлдврт дунд сурһульд 2024 җилд секгдсн прокурорск классин сурһульчнр орлцв. Классин һардач Җирһлин Надеждан келсәр, эн класст 25 күүкн-көвүн сурна. Эдн иргчдән зөв-йосна халхар эрдм шүүҗ авх күслтә, тегәд тууҗин, зөвин халхар гүн медрлтә болхар шунна. «Медрл» ниицәнә Хальмг Таңһчд үүлддг әңг эн керг-үүлдврт орлцх үрвр кехлә, эдн экскурсьт орлцхдан байрлв. Эн классин сурһульчнр Дорҗин Дильвира, Манҗин Чилгр, Җалһа Екатерина, Манҗин Карина, Басан Дана болн Җунһра Давид обществознаня, утх-зокъялын, тууҗин болн зөвин халхар бүрдәгдсн олимпиадмудын дииләчнр болна. Келхд, эдн Шарту балһсна юридическ академин марһаст бас орлцҗ, гүн медрлән иткүлнә.
Экскурсьт орлцачнр «Долан хонгин күрән» сойлын төвд цуглрад, цааранднь Баатрмудын аллейд күрв. Алексей Петрович сурһульчнрт Басан Городовиковин цергә болн олна үүлдврин тускар келҗ өгәд, мана таңһч энүнә һардврт делгрәд, кесг шин гермүд, хаалһс тосхгдсиг, бүрдәцс секгдсиг темдглв. Советин Союзин Баатр Басан Городовиков Төрскән харсгч Алдр дәәнд зөрмг кевәр дәәлдҗ, энүнә һардҗ йовсн дивизь Дорд Пруссин меҗә һатлсна тускар министр бас келв. Хальмгин алдр үрнә тускар экскурсин йовудт келҗ өгснь сурһульчнрт таасгдв. Сурһульчнр Алексей Петровичд ханлтан өргәд, иим соньн керг-үүлдвр эднд туста болсиг темдглв.
ДООҖАН Наталья
ЗУРГТ: экскурсин кем