Делгә Эрднин ачлвр – зөрмгин темдг

Алдр Диилврин 80 җилин ончта өөн угтҗ Элстд Баатрмудын Аллейд Советин Союзин Баатр Делгә Эрднин медаляр түрүн болҗ ачллһна байрин керг-үүлдвр болв. Терүнд Хальмг Таңһчин Толһач Хаска Бату, таңһчд ах федеральн инспектор Александр Беляев, Хальмг Таңһчин Улсин Хуралын (Парламентин) Ахлач Артем Михайлов, таңһчин медәтнрин Хүүвин гешүн Яшкула Константин, Советин Союзин Баатр Делгә Эрднин ач күүкн Делгә Евдокия, зөв-йос харлһна бүрдәцсин болн баһчудын олна ниицәсин элчнр орлцв.

Хальмг Таңһчин медәтнрин Хүүвин гешүд Советин Союзин Баатр Делгә Эрднин нериг мөңкрүлхин болн залу-зөрмг йовдл һарһсн нег һазра улсин ач темдглхин төлә эн ачлвр үүдәлһнә седвәр татсмн. Хальмг Таңһчин Улсин Хуралын депутатнр ачлврмудын туск таңһчин заканд сольвр орулад, медәтнрин седвәриг дөңнсмн. Әрәсән Федерацин сойлын ачта көдләч Бадендән Сергей медалиг үүдәҗ һарһсмн.
- Эндр тууҗлгч болн ончта йовдл болҗана. Делгә Эрднь Төрскән харсгч Алдр дәәнд залу-зөрмгән һарһад, хальмг улсас түрүн болҗ Советин Союзин Баатрин нер зүүсмн. Эн керг-үүлдврт ач күүкнь Евдокия Очировна орлцҗахнь темдгтә. Эн олн җилин туршарт Баатрин санл хадһлҗ, дорас өсч йовдг баһ үйд зөрмгиннь тускар медүлҗ йовна. Делгә Эрднь Хальмгин цуг улсин төлә ик бахмҗ болҗана. Эндрк байрт баһчуд орлцҗахнь бас ончта, юңгад гихлә эдн баатр кевәр дәәлдҗ йовсн нег һазра мана улсин тускар медҗ, теднәс үлгүр авх зөвтә. Дәәнә эклцд залу-зөрмгән һарһад, әмнәсн хаһцсн Делгә Эрднь тер цагт хөрн наста баахн көвүн бәәсмн. «Хальмг улс хооран цухрдмн биш», - гиҗ эн келснь, мана баатрмудын зөрмгиг герчлҗәнә. Келхд, Эрднин эк Булһн Сариевна дөрвн көвүһән Төрскән харсгч Алдр дәәнд геев. Мана таңһчд Сарпан районд Салын Тугтн бичкн Селән бәәнә, энд Советин Союзин Баатрмуд Делгә Эрднь болн Бадмин Эрнцн, Әрәсән Баатр Геннадий Лячин һарсмн. Баһчуд тиигәрән эрк биш одх зөвтә. Делгә Эрднин медаляр түрүн болҗ ачлгдҗадг улс Төрскән харсад, залу-зөрмг кевәр церглҗ йовна, - гиҗ Бату Сергеевич йөрәлин үгдән темдглв.
Советин Союзин Баатр Делгә Эрднин 1-ч тойгта медалиг Н.Пальмовин нертә Келн-улсин музейд белглх шиидвр авгдв, Хальмг Таңһчин Толһач Хаска Бату терүг Делгә Евдокияд бәрүлҗ өгв. Евдокия Очировна өрк-бүлиннь нерн деерәс таңһчин һардврт, нег һазра улст ханлтан өргв. «Мана таңһчин цуг улст зүркни ханлтан өргҗәнәв. Дән-даҗг уга, ни-негн бәәтн, мана Хальмг Таңһч делгрәд, өсәд-өргҗәд йовтха. Мини чееҗм үүмәд, иим ончта йовдл учрснд ик байрта бәәнәв», - гиҗ медәт йөрәв.
Хальмг Таңһчин Толһач Хаска Бату Советин Союзин Баатр Делгә Эрднин медаляр шишлң цергә керг-үүлдврт залу-зөрмгән үзүлсн нег һазра улсиг ачлв. Түрүн болҗ эн ачлвр авсн улс дунд полковник Одган Арслң, «Дәәч» цергә болн спортын белдврин төвин һардач Җаңһан Чимид, медицинск эгч Худила Ангелина, МЧС-ин көдләч Бүүрчин Анатолий, автоэлектрик Увшан Виктор, Элст балһсна 17-ч тойгта дунд сурһулин багш Занкидара Тимур болн нань чигн улс заагдв. Эдн цергә даалһвран күцәһәд, зөрмгән үзүлсмн. Эднә нерн деерәс Җаңһан Чимид болн Одган Арслң ханлтын үг келҗ, Делгә Эрднин зөрмг йовдл эднд үлгүр болҗахинь темдглв.
Хальмг Таңһчин Улсин Хуралын (Парламентин) Ахлач Артем Михайлов болн таңһчин медәтнрин Хүүвин гешүн Яшкула Константин өөдән ачлвр авсн улсиг йөрәҗ, хөв-кишг дурдҗ, Алдр Диилврин өөнлә йөрәв.
ДООҖАН Наталья