Ончта өөнләнь йөрәв

Хөн сарин 7-д Элстд радион болн залһлдана көдләчнрин сән Өдрлә ирлцүлҗ байрин хург болв. Хальмгин залврин ахлач Босхмҗин Гилән, энүнә дарук, то-дигин делгрлтин министр Этән Алексей, залһлдана көдләчнрин профсоюзин таңһчин бүрдәцин ахлач Цагада Василий, ирлцңгү бүрдәцсин ветеранмуд болн мергҗлтнр терүнд орлцв.
Эн җил Хальмгин радио түрүн соңсхвран белдсн цагас авн дигтә 100 җил болв. Таңһчин залврин ахлач Босхмҗин Гилән ветеранмудыг болн эндр көдлҗәдг улсиг ончта өөнләнь йөрәв.
– Өдгә цагт зәңгллһнә эв-арһс дунд радио онц орман эзлнә. Урднь мана аавнр-ээҗнр сурһуль уга болад, ямр чигн зәңгиг радион соңсхврас медҗ авдг билә. Тер цагин седкүлчнрин ач-тусинь эрк биш темдглх кергтә. Эндр өдгә цагин залһлдана эв-арһс делгрәд, хальмг келәр һардг соңсхврмуд дорас өсч йовдг баһчудт болн төрскн келән медхәр седҗәдг улст туслҗана. Олна кергт тәвцән орулҗадг улсиг әрүн седкләсн йөрәҗәнәв, – гиҗ Гилән Герасимовна темдглв.
Байрин хургин йовудт олн җилдән үнн-чик седклтәһәр көдлсн улс кесг темдгүдәр ачлгдв. Тедн дунд «Калмыкия» РИА-д маднла хамдан көдлҗәдг үүрмүд ачлгдснь темдгтә болв. Көтчнрә района «Алтн булг» газетин редактор Эрнҗәнә Раисад Әрәсән ачта седкүлчин өөдән нерн зүүлһгдв. Тер мет Целинн района «Шин җирһл» газетин редакцин ах зәңгч Мукөвүнә Инга Хальмгин сойлын ачта көдләчин нер зүүв. Хальмгин келн-улсин телеүзлин продюсер Бембинә Данара болхла, залһлдана онц темдгәр ачлгдв.
Эрнҗәнә Раисан келсәр, седкүлчәр эн 48 җилдән көдлҗәнә. Көтчнрә районд болдг керг-үүлдврмүдин болн йовдлмудын тускар дамшлтта седкүлч нег һазра улстан газетин халхст дарунь зәңглнә. Эврә райондан күндтә болн тоомсрта күн болҗ тоолгдна. Көдлмшәс нань Эрнҗәнә Раиса Көтчнрә района олна бәәдл-җирһлд шунмһаһар орлцдгинь бас темдглх кергтә.
– Эврәннь ах үүрмүдтән болн багшнртан, нег үлү Боован Владимирт ханлтан өргҗәнәв. Тиигхд Владимир Эрдниевич нанд сүв-селвгән өгч, седкүлчин күч-көлснә хаалһд орулсн болдг. Тер цагас авн эндр күртл дурта эрдмәрн көдлҗ йовнав, – гиҗ Әрәсән ачта седкүлч Эрнҗәнә Раиса ухан-тоолврарн хувалцв.
Терүнәс нань залһлдана бүрдәцст көдлҗәдг мергҗлтнр олн зүсн ачлврмудар бас темдглгдв. Керг-үүлдврин йовудт таңһчин нертә артистнр олна йөрәлин үгд багтад, билг-эрдмәрн байрлулв.
ОЛЬДАН Цаһан