Хамцу үүлдвр туста болх гиһәд

Хальмг Таңһчин Улсин Хуралын (Парламентин) делегац Луганск Улсин Республикин Өдрт нерәдгдсн байрин керг-үүлдврмүдт орлцв. Хальмг Таңһчин Улсин Хуралын Ахлач Артем Михайлов һардсн делегацин ханьд энүнә дарук Бадмин Вячеслав болн депутат Айс Никитин орв.

Байрин керг-үүлдврмүдин йовудт ЛНР-ин Улсин Хүүв Свердловск, Ульяновск болн Херсонск мүҗсин, Хальмг Таңһчин, Карелия болн Коми Республикүдин зака үүдәгч Хургудла нөкцлтин бооца батлв. ЛНР-ин Улсин Хүүвин болн Хальмг Таңһчин Улсин Хуралын (Парламентин) хоорнд бооца батллһнд зака үүдәгч бүрдәцсин ахлачнр Денис Мирошниченко болн Артем Михайлов (зургт) һаран тәвв.
- Хальмг Таңһч болн Луганск Улсин Республикин Антрацит балһсна болн Антрацитовск района хоорнд 2023 җилд бооцан батлгдснас авн бат залһлда бәрҗ, хамцу үүлдҗәнә. Бидн шин социальн бүрдәцс тосхлһнд, селәнә эдл-аху делгрүллһнд, ЖКХ-н халх батруллһнд орлцҗ, Антрацитовск района улст дөңгән күргҗәнәвидн. Нидн Элстд болсн ЮРПА-н ик хургт таңһчин Улсин Хурал ЛНР-ин Антрацитовск района Хүүвлә нөкцлтин бооца батлсн билә. ЛНР-ин болн Хальмг Таңһчин хоорнд батлгдсн бооцана йовудт бидн зака үүдәгч төрмүд хаһллһна, дамшлтарн хувалцлһна, иньгллтин залһлда батруллһна, керг-төрин хәрлцә делгрүллһнә, хойр региона әмтнә җирһлин таал ясруллһна халхар эрк биш күцәмҗтәһәр үүлдхвидн, - гиҗ Артем Михайлов темдгләд, Луганск Улсин Республик бүрдснә 11 җилин өөнлә йөрәв.
Байрин керг-үүлдврмүдт орлцсна хөөн Хальмгин делегац Антрацитовск районд одв. Района муниципальн бүрдәцин толһач, «Негдсн Әрәсә» партин бәәрн әңгин сегләтр Сергей Саенко, бәәрн Хүүвин Ахлач, «Негдсн Әрәсән күүкд улсин җисән» төсвин зүүцүләч Виктория Сошина болн Антрацитовск районд Хальмг Таңһчин элч Андрей Шаханов күндтә гиичнриг байртаһар тосв. Харһлтд хойр региона хамцу үүлдврин болн нөкцлтин төрмүд босхгдад, иньгллтин залһлдан экономикин, сойлын болн социальн халхин делгрлтд туслҗахиг темдглв. Сергей Саенко Хальмг Таңһчин һардврт ханлтан өргҗ, ах-дүүһин регион эднә босхмҗд ик дөңгән күргҗәнә гив. Виктория Сошина Антрацитовск Хүүвин болн Хальмг Таңһчин Улсин Хуралын хоорнд батлгдсн бооцан зака үүдәлһнә үүлдврт бәәтхә, әмтнд дөң күрглһнә төрмүд хаһллһнд туслҗахиг темдглв.
Артем Михайлов болхла удл уга Антрацитовск района болн Элст балһсна Хургин депутатнр харһхин тускар келв. Эн харһлт дамшлтарн хувалцхд, хамдан олн төрмүд хаһлҗ әмтнә сә хәәҗ үүлдхд туслх гив. Харһлтд орлцачнр хамдан кех-күцәх көдлмшин зуран тускар күүндәд, нег-негндән дөңгән күргх болҗ үгцв.
Харһлтын хөөн гиичнр Мөңк һалд цецгүд тәвәд, әмнәсн хаһцсн Төрскән харсачнрин санл тевчв. Эдн Антрацитовск музейд одад, бәәрн һазрин тууҗла болн сойлла таньлдв.
ДООҖАН Наталья