Бичкдүдин амрлһна тускар

Сурһулин җил төгсхдән өөрдҗ йовна, сурһульчнр удл уга зуни амрлһнд һархмн. Шидр Әрәсән гегән-герлин Министерств орн-нутгин сурһуль-эрдмин бүрдәцст сурһулин җил хөн сарин 26-д төгсәд, зуни амрлһна кем эклхин тускар зәңглв.

Эн җил мана таңһчд зуни сармудт 95 бүрдәц үүлдхмн гиҗ зуралгдҗана. Эннь 5 бичкдүдин лагерь болн дунд сурһульмудын улд өдрәр үүлддг 90 лагерь мөн. Зуни сармудт сурһульмудын улд үүлддг лагерьмүдт ут тоодан 5898 сурһульч амрхмн. Эрүл-менд батруллһна лагерьмүдт 2070 күүкн-көвүн амрад, цаган тусхаһар давулхмн. 2025 җилин туршарт ут тоодан 14115 бичкн амрлһна кемд сергмҗтәһәр цаган давулх зөвтә.
Шидр ведомствс хоорднк комиссин сүүрт бичкдүдин амрлһна кем бүрдәлһнә, зуни цагт эднә әәмшг уга бәәдл тетклһнә болн зөв-йос эвдлһнә йовдлмудас саглуллһна төрмүд хәләгдв. Бичкдүдин амрлһна керг-үүлдврмүд бүрдәлһнә көдләчнрин мергҗлт өөдлүллһнә сурһуль давулгдхмн.
ДООҖАН Наталья