Цаган тустаһар давулхин төлә

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, 2025 җилин эклцәс авн насни дигт күрәд уга 130 күүкн-көвүн цаг зуур көдлмшәр теткгдв. Таңһчин әмтиг көдлмшәр тетклһнә цергллтсин дөңгәр бичкдүд цаг зуур көдләд, мөңг олҗ чадв. Көдлмшәр теткгдсн бичкдүд нурһлҗ олн үртә болн баһ тетквртә өрк-бүлмүдт өсчәнә. Эн җилин чилгч күртл 1369 сурһульч көдлмшәр теткгдхмн гиҗ зуралгдҗана.
Сурһульчнр сән кец-таал тогталһна, бичкдүдин садмудт болн сурһульмудт ясврин көдлмш келһнд, сурһуль-эрдмин бүрдәцсин болн санлын бумблвсин эргндк һазриг хог-богас ахуллһнд орлцҗ күнд биш көдлмш кенә. «Хальмг Таңһчд әмтнд көдлмш олҗ авх дөң боллһн болн күч-көлснә таал ясруллһн болн харллһн» гидг таңһчин көтлврин медлд сурһульчнриг цаг зуур көдлмшәр тетклһнә керг-үүлдврмүд күцәгднә. Сурһуль-эрдмин әңгүд, селәдин муниципальн бүрдәцс, шаңһа болн бәәрн бүрдәцс болн онц арһлачнр насни дигт күрәд уга бичкдүдиг цаг зуур көдлмшәр теткнә.
ДООҖАН Наталья