Дааврта кемд сәәнәр белдхәр

Давсн үлмҗ өдрлә, хөн сарин 14-д, Элстд таңһчин Олна палатын болн таңһчин кесг кемҗәнә суңһвр шинҗллһнә олна штабин дарани сүүр болв. Энд шинҗләчнр цуглрад, бәәрн хүүвд болх суңһврин йовудыг шинҗлдг бүрткәчнриг белдлһнә төр хәләҗ тоолврарн хувалцв. Сүүриг Олна палатын Ахлач Муучан Баатр секв.
- Әрәсәд дууһан өглһнә өдрлә һаха сарин 14-д орн-нутгин 39 субъектд олн зүсн суңһвр болхмн. Тер мет мана таңһчд СМО-н болн РМО-н депутатнриг суңһлһна ик кемҗәтә суңһвр бүрдәгдх. Тер тоод 109 СМО-д болн 13 РМО-д тиим дааврта керг-үүлдвр болхмн, тер мет Лагань болн Городовиковск балһсдт депутатнр суңһгдх. Бас тер өдрлә суңһачнр Хальмг Таңһчин Улсин Хуралын (Парламентин) депутатын төлә дууһан өгх, гиҗ Баатр Иванович темдглв.
Эн саамд бүрткәчнрин сурһульд һол оньг өгх кергтә, теднә тоод мана шинҗләчнрәс болн багшнрас заавр авсн улс бәәнә, ода райодар йовҗ теднә медрлинь сергәҗ, шин тоотын тускар келҗ, бүрткәчнрин то икдүлҗ көдлх кергтә гиҗ Олна палатын ахлач заав.
Дарунь шинҗләчнр, дамшулачнр болн багшнр тоолврарн хувалцв. «Олна штаб кесг җилдән дигтә-даратаһар үүлдҗәнә, энд ниитә коллектив тогтсн бәәнә, күцәх көдлмш баһ биш. Яһад гихлә СМО-н үүлдврин туст закана кесг шин тоот батлгдна. Бүрткәчнрт өгдг мана селвг болн медрл бас өргҗәд йовна, эдн нәрн кесг төрәр цәәлһвр өгч, суңһврин нәрн таалд чикәр үүлдх зөвтә болна», - гиҗ штабин багш-дамшулач Мушан Истә тоолвран келв.
- Бүрткәчнриг белдлһнә чинрнь өөдләд йовна, кесг партьсин элчнрт эдн олн зүсн тоотыг цәәлһҗ чадна, тегәд теднә дөңгәр чигн суңһвр дигтә-даратаһар давна. Тегәд мана дамшулачнрин, шинҗләчнрин көдлмшин ашнь сән болҗана, тиим дааврта керг һаха сар күртл күцәгдх зөвтә, - гиҗ Олна палатын шинҗләч Дякин Раиса темдглв.
«Эн җилин суңһврт олна тоомср олсн кесг кандидатнр орлцх, тер тоод СВО-д орлцачнр бас, тегәд эн олна керг-үүлдвр ик чинвртә болхнь лавта. Бас һаха сард нарт-делкән шаҗна хург болхмн. Ирх җилд Әрәсән Орн-нутгин Хүүвд болх суңһврт олн-әмтн болн партьс орлцх. Тер тоотыг бидн оньгасн алдх зөв угавидн. Тегәд мана бүрткәчнрт бидн бат медрл өгх зөвтәвидн», - гиҗ Элст балһсна һардврин толһачин дарук Дмитрий Довгополов келв.
Сүүрин чилгчәр суңһврин туск дигтә-дарата тооца өгдг седкүлчнрт Муучан Баатр ханлтан өргв. Дамшулачнрт болн шинҗләчнрт көдлмшин сән таал бүрдәгдхмн гиҗ эн товчлҗ келв.

ТҮРВӘН Һуна