Иргч үйнрт нерәдәд

Алдр Диилврин туск санлыг мөңкрүллһнд цергә эрдм шүүҗ авсн баһчуд орлцҗахнь темдгтә. Әрәсән СКР-ин Хальмгт үүлдҗәдг мөшклһнә заллтын офицермүд иргч үйнрт нерәдҗ, цагин темдг болгч керг-үүлдвр күцәв.

Ончта эн керг-үүлдвр Н. Пальмовин нертә Келн-улсин музейин Алдр Диилврин хорад болв. Әрәсән СК-н Москван академиг төгсәсн баһ наста офицермүд Лиҗин Бадм болн Лиҗин Улан терүнд орлцв.
Иргч үйнрт нерәдҗ бичгдсн бичгиг 2045 җилд эн хәәрцгәснь һарһҗ авч умшхмн, гиҗ эн керг-үүлдвр күцәгдв. Хөрн җил болад, Алдр Диилврин 100 җилин өөн темдглгдсн кемд эндрк үйнрин бичсн бичглә әмтн таньлдҗ чадхмн. Тегәд үйнрин залһлдаг батлгч иим чинртә керг-үүлдвр күцәгдв.
Цагин темдг болгч хәәрцгт Хальмгин мөшклһнә заллтын офицермүдин зург болн иргч үйнрт нерәдҗ дәәнә ветеран Петр Леонтьевин орлцлһта видео тәвгдсн бәәнә. 2045 җилин хөн сарин 9-д Алдр Диилврин 100 җилин өөнлә эн цагин темдг болгч хәәрцг секгдәд, олнд медүлгдх болв. Эндр эн чинртә бичгиг тиизлҗ хаасн баһ наста офицермүд тер кемд идр наста, дамшлтта цергә үүлдәчнр болхнь маһд уга.

УШКАНА Сувсн