Медәтнриг ачлв

Дәәнә җилмүдт «Әәдрхн - Кизләр» гидг төмр хаалһ тосхлһнд көдлсн ветеранмуд күндтә ачлврар темдглгдв. «Элст балһсна күндтә иргн» гидг өөдән нерн эднд зүүлһгдв. Диилвр тетклһнд ик чинр зүүсн төмр хаалһин тосхлтд орлцсн, ода Элстд бәәдг ветеранмуд тиим өөдән нер зүүв. Эн җил тиим күндтә ачлврар 24 күн темдглгдсн болдг. Элст балһсна Хургин депутатнр күндтә нер зүүлһхин туск шиидвриг моһа сард батлҗ авсн билә.

Дәәнә хамгин күнд җилд тиигхд баахн күүкд-көвүд бәәсн ветеранмуд һартан күрз авч, һазр малтҗ, овалад, тегшләд, төмр хаалһ углгдх тоотынь белдсн болдг. Өдр-сө уга эдн нег-негән сольҗ көдләд, цаглань тосхсн хаалһ фронтыг цуг кергтә тоотар тетксмн. Утдан 250 дуунад татгдсн төмр хаалһин тосхлтд көдлсн Хальмгин 20 миңһн һар көгшд, күүкд улс, баһчуд баатр үүлдврин болн нәрн ик көдлмшин үлгүр үзүлсинь әмтн даңгин тодлна.
Хальмгин болн Төрскән харсгч дәәнә тууҗд орсн Әәдрхн-Кизләр хаалһин тосхлтд орлцачнрин баатр үүлдвр тиигҗ өөдәнәр үнлгдв. Сталинградын Диилврт, Кавказиг харслһна дәәлдәнд болн дәәнә цаарандк диилвртә үүлдврт йовуд өгсн хаалһин тосхачнрин санлыг мөңкрүллһнд эннь зөвтә тәвц болҗана.
УШКАНА Сувсн