Селәнә улсиг эмннә

Эн җилин үвләр Хальмг Таңһчин Толһач Хаска Батун седвәрәр таңһчин селәдәр «Эрүл-менд бәәтн!» гидг керг-үүлдвр күцәмҗтә кевәр бүрдәгдҗ давулгдв. Хол селәдт бәәдг улс эрүл-мендин бәәдлән шинҗлҗ, эмчнрт бийән үзүлҗ, олн зүсн гемиг эртәснь илдкҗ цаглань эмнлһ авхин төлә мергҗлтнр район болһнд одв. Элст балһсна поликлиникин Троицкое селәнд үүлддг 5-ч тойгта терапевтическ әңгд бас эн керг-үүлдвр давулгдсн билә.

Энд үүлддг әңгд көдлдг нүднә эмч Учан Байр болн медицинск эгч Лаглан Татьяна эн керг-үүлдврт шунмһаһар орлцҗ, кесг әмтнә эрүл-мендин бәәдлинь шинҗлв. Келхд, нүднә эмчин хорад өдгә цага кергсл бәәнә, тегәд кергтә шинҗллтиг дор ормднь кехин төлә цуг таал бәәнә. Байр Валерьевна эн әңгд «Земск эмч» гидг көтлврин йовудт ирҗ көдлҗәнә. Баахн мергҗлт бәәрн улс дунд күндллһ олҗ, кергән сәәнәр меддг эмч гиҗ тоолгдна. Эн балһсна поликлиникин медлд үүлддг нүднә микрохирургийин әңгин һардач Кутуша Цернлә хамдан месллһ, өөдән чинртә эмнлһ кенә. Энүнлә хамдан көдлҗәдг медицинск эгч Лаглан Татьяна итклтә нөкд болҗ, шинҗллт болн олн зүсн эмнлһ келһнд дөң күргнә.
- Би 1993 җилд Т.Хахлынован нертә медицинск училищ төгсәһәд, күч-көлснә хаалһан таңһчин эмнлһнә ирлцңгү әңгд эклсн биләв. Тер әңгд би оютн бәәсн цагтан санитарк болҗ көдлдг биләв, тегәд цугтаһинь сәәнәр меддг төләд нанд амр болв. Ах үүрмүдм байн дамшлтарн хувалцҗ, күч-көлснә хаалһин эклцд сүв-селвгәрн дөңндг бәәсиг ханлттаһар тодлнав. 2017 җиләс авн Троицкое селәнд үүлддг әңгд көдлҗәнәв. Мана әңгд бат ясвр кеҗ сән таал тогтав, өдгә цага кергсл углҗ тәвв, тегәд мана эмнлһн цуг некврлә ирлцнә. Бидн нүднә харань муурсн, олн зүсн гем илдкгдсн улсин шинҗллт кеһәд, месллһнд белднәвидн. Келхд, мана хәләврт нурһлҗ медәтә улс бәәнә, тегәд күн болһнд нәәһинь олҗ килмҗән тусхахар шуннавидн. Байр Валерьевна цаһан седклтә, күн болһнд килмҗән тусхана, тегәд әмтн энүг тевчнә, өгсн сүв-селвгинь оньгтан авна. Эн долан хонгин хойр өдрт месллһ келһнд орлцна. Эмнлһ авсна, месллһ кеснә хөөн эдгсн улс хөөннь ирҗ эмчд ханлтан медүлнә, - гиҗ Татьяна Боваевна келнә.
«Эрүл-менд бәәтн!» гидг керг-үүлдврин медлд эмч Учан Байр болн медицинск эгч Лаглан Татьяна бәәрн селәнә әмтнә эрүл-мендин бәәдл шинҗлснә хөөн Целинн района Вознесеновка болн Хар Булг селәдт одсн деерән хотл балһсна өөр бәәдг Лолад болн Аршанд күрв. Хөөннь эдн Хальмг Таңһчин эмчнрин багин ханьд Луганск Улсин Республикин Антрацитовск районд одв. Тенд эдн хойр долан хонгтан бәәһәд, бәәрн улст дөңгән күргв. Хальмг эмчнр ирснд бәәрн улс байрлад, мергҗлтнрт бийән үзүлҗ, эмнлһ авв. Лаглан Татьянан келсәр, нүднә эмч тал кесг күн ирв, Байр Валерьевна күн болһна эрүл-менд шинҗлҗ, эмнлһнә туст сүв-селвгән өгв.
Һучн һар җил хооран эрүл-менд харлһна көдләчин эрдм шүүҗ авсн Лаглан Татьяна әмтнд дөңгән күргҗ йовхдан байрлна. Герин эзнь Эдуард Александрович олн җилдән дотр-дундын кергүдин бүрдәцд көдләд ода ачта амрлһнд бәәнә. Гилән күүкнь болн Айта көвүнь тааста эрдм шүүҗ авч кергән олв.

ДООҖАН Наталья
ЗУРГТ: медицинск эгч Лаглан
Татьяна көдлмштән