Арһлачнр харһв

Шидр мана таңһчд «Деловая Россия» ниицәнә Хальмг региональн әңгин седвәрәр арһлачнрин төлә ик керг-үүлдвр давулгдв. Терүнд арһлачнр, шинҗләчнр болн таңһчин йосна бүрдәцсин элчнр харһад, олн зүсн төсвс делгрүллһнә төрәр күүндв. Харһлтыг бүрдәлһнд Хальмг Таңһчин экономикин болн хулд-гүүлгәнә министерств, «Мини керг» төв, Хальмг Таңһчин делгрлтин саң болн «Калмыкия» РИА дөңгән күргв.

Харһлтд орлцачнр арһлачнриг дөңнлһнә туст бәәдг эв-арһсин, алв авлһна амр диг-дарана тускар күүндәд, эврә кергән делгрүллһнд туслдг олн зүсн керг-үүлдврмүд күцәгдҗәхин тускар күүндв. Эн керг-үүлдвр мана таңһчд хойрдад давулгдҗана. Түрүн болҗ давулгдсн харһлтын ашар төсвс күцәгдв, буйнч седклин седвәрмүд бүтәгдв. Иим керг-үүлдвр кергән делгрүлхд, залһлда батрулхд болн олзтаһар үүлдврән бүрдәхд туслна гиҗ арһлачнр темдглнә. Арһлачнрин төлә сойлын көтлвр бас бүрдәгдснь темдгтә, эднә төлә эрдмчнр дамшлтарн хувалцв, цуглрсн улсиг сенр хотар тоов, эдн хамдан ду дуулад цаган сергмҗтәһәр давулв.
- Иим керг-үүлдвр кергән делгрүлхин төлә чинртә төрмүдәр күүндәд, керг-төрин шин залһлда, арһлачнр болн таңһчин йосна бүрдәцс хоорнд нөкцлт батруллһнд арһлачнрт туслна. Дәкәд цуһар үр-иньгин таалд амрад, хоорндан таньлдна, - гиҗ таңһчин экономикин болн хулд-гүүлгәнә министрин дарук Көкән Санл келв.
БАТАН Сәәхлә