Непал орн-нутгла нөкцлт батлгдв

Хальмгин Толһач Хаска Батун һардврт мана таңһчин делегац Непал орн-нутгт гиичлв. Терүнә йовудт Непалын һардврла харһҗ кесг төрмүдәр күүндәд нөкцлтин халхар залһлда бәрхәр үгцв.

Хөн сарин 16-д Непал орн-нутгин инвестицин төрмүдәр үүлддг Хүүвин һардврла харһлт болв. Терүнә йовудт экономикин халхар кесг төрмүд босхгдв. Темдглхәс, мана хойр орн-нутг Советин Союзин цагас авн сән йовудтаһар нөкцлтҗ йовла. Непалд бәәдг бүрдәцст сән кец-таал мана орн-нутгин нилчәр тосхгдв, гиҗ келх кергтә.
Тер мет Хальмг Таңһчин делегац Катманду балһснд бәәдг орс Герт одв.Тенд Советин Союзин болн Әрәсән вузмудын төгсәһәчнрин ниицән бүрдәгдәд, 58 җилин өөнд нерәдсн керг-үүлдврт манахс орлцв.
Залврин ахлач Кхадга Прасад Шарма Олин темдглсәр, мана хойр нутг урдк кевәр нөкцлтән батрулх зөвтә.
– Мадна төлә Непал өвәрц һазр болна. Тегәд иньгллтин болн күндллһнә хәрлцә тогтахар зүткчәнәвидн, – гиҗ Хаска Бату темдглв.
Хальмг Таңһчин ачта артистк Босхмҗин Диана Непалын иргнмүдиг орс болн хальмг сойлын зөөрлә таньлдулв. Орс болн хальмг дуд эн айслулҗ дуулв. Бату Сергеевич Непалын иргнмүдиг Алдр Диилврин 80 җилин өөнлә йөрәв.
Мана орн-нутгин тууҗд болн сойлд онц оньган өгч, иньгллт болн нөкцлт делгрүллһнд тәвцән орулҗана. Непал шар шаҗнд шүтдг олн-әмтнә төлә әрүн һазр болна, тер юңгад гихлә мел энд Лумбини хурлд Бурхн Багш һарсмн.
– Сиддхартха Гаутама унсн Майя-Девин нертә хурлын ормд терүг шинәс ясад тосхв. Кезәнә тенд үлдсн нег чолун эрсиг номтнр шинҗләд, әрүн орм гиҗ шиидвр һарһсн болдг. Эндр тер ормд кесг хурлмуд босхгдад, олн зуульчнр ирнә. Бидн цуһар Әрәсән болн таңһчиннь цецгәрлтин төлә зальврад мөргвидн.
Гиичллһнә йовудт Лумбини делгрлтин саңгин ахлачин дарук Кхенпо Чимедла бас харһвидн. Лумбини бәәсн ормд ирлцңгү парк бүрдәлһнә төсвд орлцх седвәр маднд орулв. Тодлхд, нидн Хальмг Таңһчин элчнрин орлцлһтаһар тенд бадм цецгин суврһн секгдлә, – гиҗ Бату Сергеевич цәәлһҗ келв.
Терүнәс нань Кхенпо Чимед шар шаҗна сурһалин тускар тодрхаһар келв. Эн ирлцңгү колледж һардна. Элстд көдлдг тиим сурһалин тускар мана делегацин элчнр бас келҗ өгв.
Намртан болх нарт-делкән шар шаҗна III хургт орлцх үрвр Кхенпо Чимедд бас кегдв. Элстд шар шаҗна парк тосхлһнд дөң-тусан күрглһнә туст күүндвр бас болв. Непал орн-нутгт нерәдсн орм тер паркд эрк биш һарһгдхмн.
ОЛЬДАН Цаһан