Әрәсән театрин марһанд орлцв

Басңга Баатрин нертә Келн-улсин драматическ театр «Золотая маска» гидг театральн мөрән тавн номинацд орад, ашлгч девсңднь орлцх зөв авсна тускар бидн урднь бичләвидн. Хөн сарин 11-д Келн-улсин театр «Уханас учрсн уршг» гидг наадан Москвад А.С. Пушкинә нертә театрин һоллгч тәәз деер үзүлв.

А.Грибоедовин үүдәврәр бүрдәсн наадан хальмг келәр театр тәвсмн. «Уханас учрсн уршг» гиҗ наадыг Хальмгин бичәч Калян Санҗ хальмг келнд орчулсмн.
Ода дөчн һар җил болад, эн наадыг театрин художественн һардач болн ах режиссер Манҗин Борис белдҗ тәвсмн. Наадыг режиссер өдгә цагин бәәдләс ул авч, талданар үзүлҗ чадв.
Әрәсән театральн тууҗд түрүн болҗ Грибоедовин дүрмүд хальмг келәр келҗ, тәәз деер һарч ирсинь олн хәләһәчнр темдглв. Грибоедовин нер туурсн нааднд ода баһчуд хоорнд учрҗадг сөрлцән болҗ хәләгднә. Ухана уршгин зовлңгинь иим болҗ һарсар наадыг режиссер үзүлҗәнә. Наадна дүрмүд тер кевәрн, учрҗадг йовдлмуд, тедн хоорндк зүтклдән чигн тер кевәрн, болв наадна дүрмүдин ухан-седкл деврҗ һарч ирҗ, улм итклтә болҗ цугнь хәләгднә. «Урднь әмтн ухан-седклән илднь үзүлхәр седдго бәәҗ гиҗ сангдна. Бидн болхла, дүринь дотрк санан-тоолвринь, үүмүлҗәх тоотынь үзүлхәр шунвидн», – гиҗ артистк Эрднин Гилән тоолврарн хувалцна. Келхәс, Гилән күүкд улсин хамгин сән дүр болҗ йилһгдв. Чацкийин дүриг тогтасн артист Такан Очр залу улсин хамгин сән дүр болҗ заагдсмн.
«Икрхг, дала юмнд күрх саната баһчуд нег-негнәсн давхар зүткснь нааднд һоллгчнь болв. Эдн цугтан бийән бив гисн ухата, тегәд эдн нег-негән соңсхш. Тер зүтклдән чик болн әрүн ухан-седкләс эдниг хольҗулна. Энтн баһчудыг үзүлсн, теднд нерәдсн наадн болҗана», – гиҗ режиссер Манҗин Борис келнә. Наадна кеерүл чигн тиигҗ хойр әңгрҗәдг зүтклдәнә бәәдл медүлнә. Хар болн шар өңг наадна кеерүлд болн дүрмүдин хувцнд һоллгчнь болв. Догшн эн хойр зүсн нииләд, фамусовск олна хорлтта нилчинь ил кевәр медүлҗәнә. Һол дүр чигн хорлтта үлмәд орна. Чацкийин цаһан хувцн йова йовҗ аштнь шарлна «Шар өңг гемтә улсиг медүлнә. Шар тоотыг уга кех, дотрасн һарһҗ хайҗ үүлдх седклтәһәр наадлав», – гиҗ Чацкийин дүр тогтасн Такан Очр келнә. Зурач Мария Шеховцова бас темдглгдв.
Хальмг театр тавн әңгд мөрә авхар орулгдснь ик чинртә йовдл болҗана. Ашлгч шиидвр ямаран эс болсн бийнь Келн-улсин театр хальмг келәр наад белдҗ тәвәд, тиим ик театральн марһанд нерән дуудулҗахнь ик сән йовдл мөн.

УШКАНА Сувсн