Аршан булгиг цеврлҗ ахулв

Шидр мана таңһчд экологическ седвәр дөңнлһнә болн делгрүллһнә «Компас» саң (Үндсни ахуллһна өвәрц) «Особенности национальной уборки» керг-үүлдвр бүрдәв. Эн Әрәсән кесг регионмудар давулгдна. Керг-үүлдврт орлцачнр Элстәс хол биш бәәдг Аршан селәнә өөр Аршан булгин эргндк һазриг хог-богас цеврүлҗ ахулв.

Әрәсән Орн-нутгин Хүүвин депутатнр Жанна Рябцева болн Башанкан Бадм, «Компас» саңгин һардач Татьяна Ковалева, Хальмг Таңһчин залврин Ахлачин дарук Җамбинә Очр, «Төрскән харсачнр» шаңһа саңгин таңһчин әңгин һардач Хаалһин Очр керг-үүлдврт орлцачнриг йөрәһәд, өсәд-боссн һазран цеврәр хадһллһна, эргндк йиртмҗ харлһна керг чинртә болҗахиг темдглв. Жанна Рябцева түрүн болҗ мана таңһчур ирсән келәд, энд цаһан седклтә, ирсн гиичнриг байртаһар тосдг улс бәәнә гив. «Эн керг-үүлдврт цергә даалһвран күцәҗ йовх дәәчнр орлцҗана, тегәд ода эн экологическ болн төрскнч сурһмҗин чинр зүүв. Цергә шишлң керг-үүлдврт орлцҗадг дәәчнр дунд хальмгуд зөрмг, чидлтә, йоста баатр кевәр сүл әмсхл күртл ноолддг улс гиҗ тоолдгна. Би эднә өмн сөгдҗ, зөрмгәрнь бахмҗ кенәв. Хальмг Таңһч мини зүркнд онц орман эзлв», – гиҗ Әрәсән Орн-нутгин Хүүвин экологин, йиртмҗин зөөрин болн эргндк йиртмҗ харлһна комитетин ахлачин дарук Жанна Рябцева келв.
«Компас» саң һурвн җил дарандан мана орн-нутгин регионмудар эн керг-үүлдвр давулҗана. Саңгин һардач Татьяна Ковалеван келсәр, Бурять Республикд давулсн субботникин хөөн эдн мана таңһчур ирв. Мана хөөн эн керг-үүлдвр Калининград балһснд давулгдхмн. Башанкан Бадмин келсәр, ах-дүүнр Бурятин хөөн мана таңһч Цугәрәсән кергт орлцснь болн хөөннь Калининградт эн болхнь хара биш болна. Шар шаҗнд шүтдг Бурятин болн Хальмг Таңһчин улс ах-дүүнр болҗ, хоорндан бат залһлда бәрнә. Мана нертә генерал, Советин Союзин Баатр Басан Городовиков дәәнә цагт эврәннь цергчнртәһән хамдан орн-нутгин меҗә һацад, Пруссьт орсмн.
Эн керг-үүлдвр йирин субботник биш, терүнә йовудт келн-улсин өвәрцән үзүлх кергтә. Тегәд субботникин хөөн саадгар халһна марһан болв, таңһчин үүдәгч коллективс болн Аршан селәнә 15-ч тойгта сурһулин күүкд-көвүд билг-эрдмән үзүлв. Дәкәд цуглулсн хог-бог дундас өвәрц кегдлмүд олҗ авсн улст «Компас» саңгин белгүд бәрүлҗ өггдв. Субботникд цергә шишлң керг-үүлдврин ветеранмуд, оютнр болн эврә сән дурар үүлддг улс орлцв. Эн өдр Аршан булгин өөр кесг хог-бог цуглулгдв. «Особенности национальной уборки» керг-үүлдврин йовудт һурвн җилин эргцд ут тоодан 20 миңһн күн орлцад, 300 тонн хог-бог цуглулсмн. Мана таңһч бас Цугәрәсән керг-үүлдврт орлцад, бәәсн һазран цеврәр бәәлһнә кергт тәвцән орулв.
БАТАН Сәәхлә