Зөргтә дәәч Көкән Хаалһ

«Цаһанас мунь – цасн,
Цагин мунь – дән»
гиҗ үлгүрт келгддмн.
Дән гисн үг һурвхн үзгәр тогтсн оһтр үг, дәәнә көлд делкә дәәвлдг, дәәнәс көлтә орчлң зовдг, дән үрн-сад өнчрәдг, дән әмтнә насн-җирһл таслдг, дән гих юмн бичә үзгдтхә, үснә үзүрәр йовг, гиҗ көгшд зальврдмн.
«Җирһл насн хойран
Җидин үзүрт өлгий
Җилв баһ хойран алдр
Җаңһртан нерәдий» – гиҗ «Җаңһрин» дуулврин бодңгудин андһар бәәдг. Көкән Ноостын Хаалһиг – Җаңһрин бодңгудла дүңцүлҗ келҗ болхмн. Шораһас нигт, шорһлҗнас олн орчлңд төрҗ ирәд, эн орчлңд тусан күргсмн. Тоолҗ тооһнь авч болшго, теңгрин одд дунд гилвкснлә әдләр орн-нутган хортнас харсад нерән һутал уга, дөрвн җилә дәәнә һалар орад, зөрмг баатр йовдл һарсн күн мөн. Хаалһ Ностаевич 1920 җилд Көтчнрә Тугтн селәнә, Сохр Бор гидг һазрт һарсмн. Һунтадан эцк уга үлдәд, белвсн эктәһән, Шорва эгчтәһән наһцхдан Шовһра Шевена Батнаснад өссмн. Сурһуль сурх наснь күцв, 1930 җилд Цаһан Нуура сурһульд экләд сурсмн. 1941 җилин хөн сард цергт мордад, Сталинградск мүҗин Солодушино селәнд тусв. Тендән баһ командирин сурһуль сурад, баһ сержантин цол зүүсмн. Дәәнә болн дәәнә хөөн эцкиннь җирһлин тускар Эрднь көвүнь тодрхаһар «Защитить, выжить, продолжить род» нертә дегтрт цәәлһәд бичсмн. Зөрмг дәәч Көкән Хаалһд шүлгән нерәдҗәнәв. Нег һазра баатрмудын нерд мартгдх зөв уга, мөңкинд олна санлд бәәтхә.
ХАТУҺА Николай,
Әрәсән бичәчнрин ниицәнә гешүн,
Хальмг Таңһчин сойлын ачта көдләч