Шаңһа дөңгәр кергән делгрүлҗәнә

Тавн җил хооран мана орн-нутгт баһ тетквртә болн җирһлин күнд таалд туссн улсиг дөңнҗ олз-оруһинь икдүлхин төлә социальн бооцан батлгддг болв. «Өрк-бүл» гидг келн-улсин төсвин медлд социальн бооцана керг-үүлдврмүд күцәгдҗәнә. Мана таңһчд эн көтлврт орлцсн улсин то җил ирвәс өсәд йовхнь темдгтә. Эн җилмүдин эргцд кесг миңһн күн социальн бооца батлад, шаңһа мөңгәр эврә керг бүтәҗ эс гиҗ дөңцл эдл-аху бүрдәҗ өрк-бүлән теҗәдг, олзта-тустаһар үүлддг болв.

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, 2024 җилд 549 өрк-бүл социальн бооца батлад, шаңһас дөң авв. Эн җил мана таңһчд 645 социальн бооцан батлгдхмн гиҗ зуралгдсмн, эн кергт ут тоодан 142,4 сай арслң йилһгдх зөвтә. Сүл кесн то-дигәр, эн җилин эклцәс авн таңһчин әмтнә социальн харслтын цергллтс 359 социальн бооца батлсн бәәнә. Социальн бооца батлад, эврә керг болн дөңцл эдл-аху бүрдәҗ, көдлмш олҗ авад җирһлин тетклһән ясрулҗ болхмн.
Мана таңһчд социальн бооца батлсн улс дунд ик зунь эврә керг бүтәҗ үүлдхәр шунна. Эврә керг бүтәлһнд шаңһас 350 миңһн арслң өггднә. Терүнә төлә зура белдҗ, әмтнә социальн харслтын цергллтин комиссьт терүг харсад, олзта-орутаһар үүлдҗ чадхан иткүлх кергтә. Мал хулдҗ авч, эврә дөңцл эдл-аху бүрдәх улст 200 миңһн арслң өггднә. Эн халхар социальн бооца батлсн улс нурһлҗ бод мал хулдҗ авад, хөөннь төл авч эдл-ахуһан делгрүлнә. Көдлмш хәәҗәдг күн социальн бооца батлх санаһан медүлхлә, әмтиг көдлмшәр тетклһнә цергллтин тоод авна. Энүнд эрдмәрнь көдлмш олҗ авна эс гиҗ немр эрдм дасхд дөң күргнә. Иим улс социальн бооца батлад көдлмшт һарсна хөөн һурвн сардан 18942 арслңга дем авна. Җирһлин күнд таалд туссн улст болхла кергтә өлг-эд, хувц-хунр болн нань чигн талдан эд-тавр хулдҗ авлһнд болн эмнлһнд нег дәкҗ 113652 арслң, эс гиҗ өрәл җилин эргцд сар болһн 18942 арслң өггднә. Шаңһас өгчәх мөңгиг социальн бооца батлсн улс олзта-тустаһар олзлх зөвтә.
Социальн бооца батлад, өрк-бүлән теҗәдг арһта улсин то җил ирвәс өсәд йовна. Селән һазрт бәәдг улс шаңһа дөң олзлад, эврә керг бүрдәҗ олзта-тустаһар үүлдҗәхнь байрта. Тиигәд, Көтчнр селәнд өсәд-боссн Комлан Кирсан хот-хоолын лавк секв. Нидн эн района әмтнә социальн харслтын цергллтлә бооца батлад, кергтә бәрмт цаас цуглулад, эврә кергин зура белдәд, шаңһас 350 миңһн арслңга дем авв. Тер мөңгәр эн хот-хол хадһлдг киитрүләч, тагтс болн нань чигн кергсл хулдҗ авад, эврәннь уульнцд лавк секв. Баахн залу арһлач болад, алвна цергллтд тооцаһан өгнә. Комлан Кирсан эврән хулдачар көдлнә, эн хулд кехәр ирдг улсин неквр оньгтан авч, олн зүсн хот-хол авч ирхәр шунна. Тиигәд шаңһа дөңгәр залу күн төрскн селәндән кергән делгрүлҗәнә.
Городовиковск балһснд бәәдг Богдран Владимир (зургт) Виталий Крикунов хойр социальн бооца батлад, һаңначин кергән эклв. Залу улс һартан эвтә, төмрәр олн зүсн ке-сәәхн кегдлмүд кеҗ һарһна. Шаңһас өгсн мөңгәр эдн кергсл хулдҗ авад, әмтнд һаңначин туслмҗ күргҗ олзтаһар көдлҗәнә. Залу улс кесгәс нааран эврә керг бүтәхин тускар санҗала,зуг эврә мөңгн уга бәәсмн, тегәд шаңһа көтлвр иим улст дөң күргдгиг медәд, района социальн харслтын цергллтлә бооца батлв.
Мана таңһчд социальн бооца батллһна көтлвр күцәмҗтәһәр күцәгдҗәхәс иштә әмтнә социальн харслтын цергллтсин мергҗлтнр Луганск Улсин Республикин Антрацитовск района үүрмүдтә дамшлтарн хувалцна. Одахн Элст балһсна әмтнә социальн харслтын цергллтин мергҗлтнр ЛНР-ин социальн харслтын төвин 10-ч әңгин көдләчнрт социальн бооцана тускар тодрхаһар келҗ өгв. Эдн эврә керг бүрдәхин төлә ямаран бәрмт цаас белдхин, ямаран кергт шаңһа мөңгиг олзлхин тускар цәәлһв. Антрацитовск района әмтнә социальн харслтын төвин һардач Екатерина Бабичеван келсәр, Хальмг Таңһчин социальн делгрлтин, күч-көлснә болн көдлмшәр тетклһнә министерствин болн терүнә медлд үүлддг бүрдәцсин мергҗлтнрин дөң-тусар 2024 җилд бәәрн улс социальн бооца батлҗ шаңһа дем авв. Эн җил шаңһа көтлврт орлцх улсин то эрк биш өсх гиҗ эн темдглв.
ДООҖАН Наталья