Депутатнр ясврин көдлмш бүрткв

Эн җил мана таңһчд «Сурһуль-эрдмин халхин шинрлт» гидг орн-нутгин көтлврин йовудт болн «Негдсн Әрәсә» партин халхар сурһуль-эрдмин 12 бүрдәцд бат ясвр кегдҗәнә. Шидр Хальмг Таңһчин Улсин Хуралын (Парламентин) Ахлач Артем Михайлов таңһчин Улсин Хуралын депутат Аздора Александрла хамдан Городовиковск балһсна 3-ч тойгта дунд сурһульд кегдҗәдг ясврин көдлмшин йовудыг бүрткв.

Эн сурһуль 1986 җиләс авн үүлдҗәнә, тер цагас авн 2200 сурһульч терүг төгсәв. Ода тосхачнр сурһулин бәәрнә дотркинь ясчана, эдн шин сурһулин җил эклтл цугинь төгсәхәр зуралҗана. Артем Михайловин келсәр, мана таңһч давсн җилд сурһуль-эрдмин бүрдәцст бат ясвр келһнә халхар нүүрт һарв. Тегәд эн җил бәрсн күцәмҗән батлад, күүкд-көвүдин болн багшнрин төлә өдгә цага сән таал тогтахар зуралҗана.
«Негдсн Әрәсә» парть Әрәсән гегән-герлин Министерствлә хамдан сурһуль-эрдмин бүрдәцсин бат ясвр келһнә төсв күцәҗәнә. Эн төсв күцәлһнә седвәриг Әрәсән Президент Владимир Путин 2021 җилд партин ик хургт зарлсн билә.
Тер өдрин бийднь Артем Михайлов Городовиковск болн Яшалтан райодын «Березка» болн «Лесная сказка» амрлһна лагерьмүдт одв. Зуни амрлһна кемд эн бүрдәцсиг белдлһнә тускар райодын толһачнр Абушинә Валерий болн Шаран Пүрвә келҗ өгв. Харһлтд таңһчин Улсин Хуралын депутатнр Аздора Александр, Елена Лотник болн Яков Герман орлцв. Лагерьмүдин һардачнр Людмила Плугова болн Мушан Владислав бичкдүд сергмҗтәһәр амрад, эрүл-мендән батрулхин төлә тогтагдсн таалын тускар тооцаһан өгв. Бичкдүд амрдг, нааддг, хот уудг хорасиг эдн шинҗлҗ хәләв.
Одахн Санкт-Петербург балһснд зака үүдәһәчнрин ик хургт бичкдүдин зуни амрлһна төрт ик оньг өггдснә тускар Артем Михайлов келв. Бичкдүдин амрлһна кем бүрдәлһнә туст орн-нутгин болн региона закадт сольвр орулгдхмн, терүнә төлә лагерьмүдин таал бүртгдхмн, гиҗ эн темдглв. Бичкдүдин лагерьмүдт әәмшг уга бәәдл тетклһнә, олн зүсн гемәс саглуллһна төрмүдт һол оньг өгх кергтә гиҗ бүртклһнә керг-үүлдврт орлцачнр товчлв.

ДООҖАН Наталья