Манҗин Аркадин талвң секгдх

Вчера, 12:38 | Общество

Урҗ өдр Элст балһсна һардврин толһачин дарук Хаска Сергей таңһчин олнд зәңгллһнә эв-арһсин көдләчнрлә харһад, Хальмгин Баатр Манҗин Аркадин нертә шаңһа филармонин өмн сән кец-таал тогталһна тускар тодрхаһар келҗ өгв. Энд көгҗмчин нертә талвң секгдхмн. Ода ясврин көдлмш эклсн бәәнә, терүг зунын чилгч күртл төгсәх күсл тәвгдҗәнә.
- Энд урһҗадг харһа моддын наад бийднь Манҗин Аркадьд нерәдгдсн бумб тәвгдхмн. Ода деерән бумб белн бәәнә. Көгҗмч хойр һаран дайлад, филармоньд ирсн улсиг байртаһар тосчах болҗ медгдх. Бумбин өөр бичкн усна һооҗур углҗ тәвгдх. Зунын кемд һаң халун болна, тегәд олн әмтн амрдг ормд эрк биш серүн таал тогтахин төлә бичкн болв чигн һооҗур бәәхлә сән болхмн. Цааранднь талвңгин тал дунд әмтн сууһад, үүрмүдән күләхин эс гиҗ концертин хөөн хамдан сергмҗтәһәр амрхин төлә олн зүсн скамейкс тәвгдхмн. Энд давҗах хаалһар кесг көлгн йовна, тегәд талвңд амрчах улсин төлә сән таал тогтахин төлә модд суулһгдхмн. Элст балһсна һардврин толһач Лиҗика Алдр тосхлтын материалмуд ик оньг тусхаҗ, хам-хоша бәәдг регионмудла бат залһлда бәрҗ нөкцҗ үүлдҗәнә. Талвңд углҗ тәвгдх плитк сән чинртә, тегәд эн олн җилдән өңгән сольшго, удан эдлврт олзлгдхмн, – гиҗ Сергей Андреевич келв.
Манҗин Аркадин нертә талвң хотл балһсна әмтнә болн таңһчин гиичнрин төлә амрлһна дурта орм болхин төлә цугнь дигтә-даратаһар кегдхмн – гиҗ Хаска Сергей темдглв. Талвңгин төсвиг бәәрн мергҗлтнр үүдәҗ һарһв, тосхлтын көдлмшиг бәәрн тосхачнр кехмн. Тегәд цуһар седклән тәвәд, сән кец-таал тогталһна көдлмшиг өөдән чинртәһәр күцәхәр шунҗана. Шин талвң тосхгдҗахас иштә филармонин бәәриг бас шинрүллһнә төр бас тәвгдҗәнә.
- Намртан мана таңһчд болх бурхн-шаҗна чуулһнд нарт-делкән кесг орн-нутгас гиичнр ирхмн. Зәрмснь мана орн-нутгур түрүн болҗ ирхмн, тегәд бидн таңһчиннь бәәтхә, Әрәсән нериг өөдән бәрҗ гиичнртән хотл Элст балһсан үзүлх болҗанавидн, – гиҗ Хаска Сергей келв.

ДООҖАН Наталья

Видео