Нөкцлтән делгрүлҗ

Хөн сарин 23-ас авн 25 күртл Благовещенск балһснд «АмурЭкспо-2025» Әрәсән-Китдын экономическ хург давулгдв. Хол Дорд үзгин округд эн җилин чинртә керг-үүлдврмүдин негнь болна. Улсин Хуралд (Парламентд) Хальмг Таңһчин Толһачин элч Манҗин Араш, Хальмгин экономикин болн хулд-гүүлгәнә министрин дарук Ганжиган Наталья, сойлын министрин үүл дааҗадг Түрвән Саглр, Хальмг Таңһчин делгрлтин саңгин әңгин һардач Озан Делгр болн баахн артист Поштара Мазн таңһчин делегацин ханьд орв.
Хургин йовудт Амурск мүҗин залврин ахлачин дарук Павел Пузановла болн залһлдана болн зуульчллһна министр Екатерина Киреевла харһлт болв. Терүнә йовудт Хальмгин болн Амурск мүҗин хоорнд хулд-гүүлгәнә болн экономикин халхар нөкцлтин туск ил күүндвр болв. Мана таңһчин арһлачнрин кеҗ һарһдг эд-тавр Амурск мүҗд болн Китдын орн-нутгт хулдхар бас үгцв.
Баахн артист Поштара Мазн хальмг улсин сойлла хургт орлцачнриг таньлдулҗ, билг-эрдмәрн байрлулв.
– «АмурЭкспо-2025» экономическ хургт орлцад, мана таңһч регионмуд болн нарт-делкәд хоорндк хәрлцәһән улм батрулҗ чадв. Хургин бүрдәһәчнрт ханлтан өргҗ, шин нөкцлтин туст залһлдаһан цаарандан делгрүлхәр зүткчәнәвидн, – гиҗ Хальмгин делегациг һардҗ йовсн Манҗин Араш темдглв.

ОЛЬДАН Цаһан