Сурһульчнр көдләд мөңг олҗана

Зуни амрлһна кем эклхлә, зәрм сурһульчнр эк-эцкдән нөкд болад, мөңг олхар шунна. Сән авъяст тохрсар, «Әмтиг көдлмшәр тетклһнд туслһн» гидг таңһчин көтлврин йовудт насни дигт күрәд уга бичкдүдиг цаг зуур көдлмшәр тетклһнә керг-үүлдвр бүрдәгднә. Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, ода деерән 1288 сурһульч зуни амрлһна кемд көдлмшәр теткгдв. Хамгин түрүнд олн үртә өрк-бүлмүдин, гемтә-шалтгта болн цергә шишлң керг-үүлдврт орлцачнрин күүкд-көвүдт көдлмш олҗ авхд дөң күргнә. Эн җил күсдундур миңһн сурһульч цаг зуур көдлмшәр теткгдхмн гиҗ зуралгдсмн.

Насни дигт күрәд уга бичкдүд нурһлҗ сурһулин бүрдәцдән көдлнә. Эдн дегтрин саңд дегтрмүдиг ясад, шин сурһульд белднә. Дәкәд эдн сурһуль-эрдмин бүрдәцсин болн санлын бумблвсин ясврин көдлмш келһнд, эргндк һазр ахулҗ сән кец-таал тогталһнд орлцна. Селәдин болн балһсдын муниципальн бүрдәцс, сурһуль-эрдмин, баһчудын керг-төрин әңгүд болн онц арһлачнр сурһульчнриг көдлмшәр теткнә. Бичкдүдт җалв деернь таңһчин хазнас немр мөңг өгнә. Эн җил ирлцңгү кергт таңһчин хазнд 2,7 сай арслң батлгдв. Күүкд-көвүд олсн мөңгәрн сурһульднь кергтә эд-тавр эс гиҗ тааста хувц хулдҗ авна, эк-эцкнртән чигн дөңгән күргнә.
Таңһчин гемтә-шалтгта бичкдүдин реабилитацин төвд арвн күүкн-көвүн көдлв. Төвин мергҗлтнрин келсәр, җил ирвәс зуни амрлһна кемд көдлх седклтә бичкдүдин то өсәд бәәнә. Эрмдгтә күүкд-көвүдт үүл бәрҗ, олн зүсн даалһвр күцәһәд, эклсн кергиг күццднь күргдг эв-арһ даслһн туста болна. «Сәәнәр күцәсн көдлмш эднд ик байр үүдәҗ, эврән көдләд олсн түрүн мөңгнь бас ик чинртә болна. Эдн төвин һаза эргндк һазр ахулад сән кец-таал тогталһна көдлмшт орлцв (зургт), замчнрт дөңгән күргв. Дәкәд эдн мана төвин улд үүлдҗәдг лагерьт олн керг-үүлдврт орлцад, сурһмҗлачнрт нөкд болв. Тиигәд мана бичкдүд цаг зуур көдлсн деерән лагерьт цогц-махмудан батрулад, сергмҗтәһәр амрв», - гиҗ социальн бүрдәцин көдләчнр темдглв.
Хотл балһсна 4-ч тойгта дунд сурһулин 9-ч классин сурһульч Сарңга Деля нидн бас төрскн сурһульдан көдллә. Күүкнә эк-эцкнь энүнә седвәриг дөңнәд, зуни амрлһна цагиг олзта-тустаһар давулх шиидвр авсинь буульв. «Нанд мис бәәнә, тегәд мөңгән терүнә эмнлһнд олзлнав. Дәкәд бийдән шин хувц хулдҗ авхар бәәнәв. Бидн зуни кемд һурвн сардан амрнавидн, тегәд нег сард көдләд биидән кергтә мөңг олхд арһ өгчәхнь йир сән. Эврән көдләд, күч-көлснә үниг медсн күн мөңгиг олзта-тустаһар һарһдг дасна, ямаран чигн эрдм чинртә болдгиг меднә»,- гиҗ Деля келв. Дунд сурһулин дегтрин саңгин көдләч Колушкинә Инесса күүкиг бууляд, үнн-чик седклтәһәр даалһвриг күцәнә гиҗ темдглв. Эн хойр җил дарандан дегтрин саңд көдләд нөкд болҗана, гиҗ Инесса Петровна күүкиг буульв.

ДООҖАН Наталья