Хальмг автономин тускар күүндв

Хальмг Таңһчин автономин 105 җилин өөн угтҗ «Медрл» ниицән баһчудын төлә гегәрлтин керг-үүлдврмүд бүрдәв. Олна ниицәнә гешүд таңһчин тууҗин болн сойлын тускар келҗ өгв. Элст балһсна һардврин толһачин дарук Довгопола Дмитрий болн Б.Б. Городовиковин нертә Хальмг ик сурһулин багш Аман Даглара баһчудла харһв.

Хальмг Таңһчин сурһуль-эрдмлә залһлдата темдгтә керг-үүлдврмүдин болн йовдлмудын тускар келҗ өгәд, таңһчин әмтнә төлә автономь бүрдәгдснь ямр чинр зүүснә тускар өргн күүндвр болв. Номин, сурһуль-эрдмин, сойлын болн эрүл-менд харлһна халх делгрүллһнд ик тәвцән орулсн улсин, эднә нилчәр мана таңһчд үлмә уга бәәдл тогтҗ батрсна тускар харһлтд онц келгдв. Теднә тоод Советин Союзин Баатр, генерал-лейтенант Басан Городовиков, нертә номтнр Эрднин Пүрвә, Эрднин Үрбҗр, Кичгә Төлә мөн.
- Баһ үйин улс Төрскнәннь тууҗиг медх зөвтә, тууҗлгч йовдлмудын, давсн җилин болн иргчин тускар бахмҗтаһар келх болҗана. Таңһчин иргчин делгрлт болн босхмҗин туст күн болһн дааврта болх зөвтә, - гиҗ Довгопола Дмитрий темдглв.
Баһчуд кесг сурвр өгч, хәләгдсн төрәр өргн күүндвр тогтав. Аман Дагларан келсәр, дорас өсч йовдг баһ үйнр таңһчин олна бәәдл-җирһлд шунмһаһар орлцҗахнь, эврә сән дурар седвәр татад, сойлын төсвс күцәдгнь, шин медрл хоршаҗ авхар зүткҗәхнь ик чинр зүүҗәнә.

БАТАН Наталья
ЗУРГТ: Элст балһсна һардврин толһачин дарук Довгопола Дмитрий баһчудла харһсн кем