Олна кергт шунмһаһар орлцхар

Әрәсән баһчудын Өдр угтҗ Хальмг Таңһчин Улсин Хуралын (Парламентин) медлд үүлддг баһчудын Олна палатын дарани сүүр болв. Терүг олна бүрдәцин ахлач Дорҗин Санл һардҗ давулв. Таңһчин Улсин Хуралын (Парламентин) Ахлач Артем Михайлов, ЮФО-д Әрәсән Президентин күцц зөвтә элчллтин аппаратын Хальмг Таңһчд федеральн инспектор Сергей Бойко, таңһчин сурһуль-эрдмин болн номин министрин үүл дааҗадг Натра Антон, таңһчин баһчудын кергүдин Агентствин һардач Камиль Маркеев, таңһчин Олна палатын ахлач Мучан Батыр болн нань чигн улс сүүрин көдлмшт орлцв.

Сүүрин эклцәр Артем Михайлов баһчудын палатын гешүдт күцәмҗтә үүлдвр дурдҗ, таңһчин Улсин Хуралын депутатнр эднлә дамшлтарн хувалцҗ, ямр нег төрәр сүв-селвгән өгч хамцу көдлхдән белн бәәхиг медүлв. «Өдгә цагт баһчудын керг-төрмүдт орн-нутгин һардвр ик оньг өгч, эдн олна бәәдл-җирһлд шунмһаһар орлцҗ, эднә седвәриг дөңннә. Баһчуд зака үүдәгч үүлдврт орлцад, таңһчин делгрлтд тәвцән орулх күслтә кергиг бидн бас урмдулхвидн» - гиҗ Артем Васильевич темдгләд, Олна палатын гешүдт Хальмг Таңһчин Хуралын (Парламентин) Ахлачин Ханлтын бичг бәрүлҗ өгв.
Нидн баһчудын палат ямаран керг-үүлдврмүд күцәснә, көдлмшин аш ямаран болсна тускар Дорҗин Санл тооцаһан өгв. Энүнә келсәр, эдн баһчудын седвәр дөңнлһнә, төрскнч сурһмҗ өглһнә болн нань чигн халхар төсвс күцәлһнд шунмһаһар орлцв. Тиигәд, «Баһчудын цаг» сурһулин көтлврин йовудт олн зүсн керг-үүлдвр бүрдәгдв, Әрәсән Өмн үзгин округин парламентсин баһчудын Ассоциацин, таңһчин Улсин Хуралын комитетмүдин көдлмшт эдн орлцв. Олна палатын гешүд баһчудын политикин төрмүдәр болдг «төгрг ширән» сүүрт, семинармудт, хургудт орлцҗ, дамшлтарн хувалцна. Баһчудын палатын ханьд таңһчд үүлддг олна бүрдәцсин болн райодын элчнр орна, тегәд эдн хамдан олн төрмүд хаһлхар шунна. Нидн эдн коммерческ биш бүрдәцслә нөкцлт батрулҗ үүлдв, терүнә ашт чинртә кергүдин седвәриг дөңнҗ, хамдан бәәдл-җирһлд тохрав.
Эн җил кех-күцәх керг бас баһ биш болна, тегәд ямаран төрмүдт баһчудын палат һол оньган өгхин тускар сүүрт бас келгдв. Сүүрт орлцсн Сергей Бойко, Камиль Маркеев, Мучан Батыр үүлдвриннь тускар олнд медүлҗ, таңһчин олна бәәдл-җирһлд шунлттаһар орлцх сүв-селвг өгәд, таңһчин Улсин Хуралын депутатнр суңһачнртаһан харһад, тооцаһан өгнә, тегәд эн халхар көдлмшән ясрулх кергтә гив. Цергә шишлң керг-үүлдврин ветеран Ханан Дольган баһчудын Олна палатын гешүн болв, энүнд күцәмҗтә үүлдвр дурдв. Баһчуд эднә сүв-селвгиг учртан авч көдлмшән шунмһадулх болв.
ДООҖАН Наталья