Хальмг Таңһчин Өдр угтад

Хальмг Таңһчин сән Өдр өөрдҗ йовна. Хальмгин автономь бүрдәгдәд, дигтә 105 җил болҗана. Эн өдр таңһчд олн зүсн соньн керг-үүлдврмүд давулгдхмн. Энүнә тускар тодрхаһар шидр болсн брифингд таңһчин сойлын болн зуульчллһна министрин дарук Санҗрһа Герман келҗ өгв.
Герман Эрднеевичин келсәр, эн җил Хальмг Таңһчин Толһач Хаска Батун даалһсар, ирлцңгү керг-үүлдврмүд таңһчин район болһнд давулгдхмн.
Н.Н.Пальмовин нертә Келн-улсин музейд болн А.Амр-Санана нертә Келн-улсин дегтрин саңд болхла ирлцңгү һәәхүлмүд болн керг-үүлдврмүд эртәснь эклв, гиҗ келх кергтә.
Така сарин 4-д Манҗин Аркадин нертә Хальмг филармоньд шаңһа ачлврмуд бәрүлҗ өглһнә байрин хург болхмн. Маңһдуртнь хальмгудын негдгч чуулһн болсн тууҗлгч чинртә Яшкулин района Чилгр селәнд таңһчин һардврин болн Басңга Баатрин нертә артистнрин орлцлһта байрин керг-үүлдвр бас бүрдәгдхмн.
Тер мет таңһчин залврин гешүд райодар йовҗ, төрскн һазриннь делгрлтд тәвцән орулсн улсиг ачлхмн. Элстд болхла байрин концерт болн спортын марһас болхмн. Таңһчин иргн болһн хальмг хувцта ирҗ, нәәрт орлцҗ чадҗана.

ОЛЬДАН Цаһан