Лаганяхн – даңгин түрүнд!

Эн өдрмүдт хамгин дааврта бичгдлһнә кем төгсәд, ода җилин хойрдгч девсңд орҗанавидн. Мана газетин тууҗ таңһчин өдр болһни тууҗла батар залһлдата мөн.
Эн җил така сарин 5-д мана Хальмг Таңһч 105 җилин өөнән темдглх, дәкәд болхла һаха сарин чилгчәр түрүн болҗ шар шаҗна нарт-делкән хург давулгдх. Цуг эн йовдлмудын тускар мана газетин халхст умшхит. Җил ирвәс бичгдлһнә кем җаңһрта болад бәәнә. Тер бийнь тадн, мана эңкр умшачнр, мадниг дөңнәд, хальмг келән тевчәд газетиг оларн бичүлҗ авцханат! Хамгин түрүнд Лаганя, Хар Һазра, Яшкулин, Үстин, Целинн, Яшалтан райодын умшачнриг болн һардачнриг темдглхәр бәәнәвидн.
Зуг Баһ Дөрвдә района умшачнрин то җил ирвәс баһрад йовхнь зөвәр һундлта болҗана. Цуг мана итклтә умшачнр, тана цаһан седкл, тана халун зүркн маднд омг үүдәҗ байрлулна, таднд ик гидг ханлтан өргҗәнәвидн! Тадн төрскн газетән дөңнсн деерән хальмг кел, сойл делгрүллһнд эврә тәвцән орулҗ бәәнәт! Тадна нилчәр хальмг келн өргҗәд делгрәд йовтха!
Бембин Евгений