Моңһл шүлгләнә байрт орлцачнриг йөрәв

Хальмг Таңһчин Толһач Хаска Бату моңһл келтнрин һурвдгч нарт-делкән шүлгләнә байрт орлцачнрла харһв. Моңһлчудын шүлгләнә байр Элстд мөчн сарин 26-д эклв. Моңһлын, Китдин, Бурятин шүлгчнр Хальмгт цуглрҗ ирв.
Моңһл келтнрин оюни җирһлд ик чинр зүүҗәдг эн ниицәнд орлцачнриг Хальмг Таңһчин Толһач үнн седкләсн йөрәв.
Таңһчин Толһач Хаска Бату иим керг-үүлдврмүд улсин хоорндк иньгллтиг батллһнд ик туста болдгинь зааһад, Әрәсән болн Моңһлын хоорндк нөкцлт кезәнәс авн эклсинь тодлулв. Төрскән харсгч Алдр дәәнд моңһлчудын орулсн ик тәвциг темдгләд, Бату Сергеевич цуг орлцачнрт хөв-кишг дурдв. Эн байрта марһана йовудт үүдсн цуг соньн седвәрмүдин тускар өргнәр олнд медүлх даалһвр таңһчин залврт өгчәхин тускар Бату Сергеевич иткүлҗ келв.
Шүлгләнә эн ик байрин күндтә гиичнр дунд хальмг улсин җаңһрч Окна Цаһан Зам – Каарун Владимир, делкән келн-улсин Ассамблейин утх-зокъялын хүүвин ахлач, World organisation of writers (WOW) Цуг делкән бичәчнрин бүрдәцин президент Маргарита Аль, моңһл шүлгчнр Моңһлын Булган әәмгин бичәчнрин ниицәнә ахлач, номт Батжаргал Намсрайжавын, Өвр Моңһлдан нертә бичәч, шүлгләнә кесг марһана дииләч, малч Эрдэнэмөнх Баламраиз болн нань чигн үүлдәчнр болн билгтнр йовна.
ХӨӨЧИН Галина