Туурмҗин болн Күндллһнә орденәр ачлв

Мөчн сарин 28-д Хальмг Таңһчин Толһач Хаска Бату 45 насна өөнән темдглв. Москван болн Цуг Әрәсән Әрүн гелң Кирилл Бату Сергеевичиг һарсн өдрләнь бүләнәр йөрәв.
«Хальмг Таңһчин Толһачин дааврта үүлиг дааһад, эн җилмүдин туршарт социальн-экономическ төрмүдт һол оньг өгсн деерән баһчудт оюни, төрскнч болн спортын халхар сурһмҗ өгч күцәмҗтә һардач болҗахан та медүлвт. Орс чонҗин Элстин епархийин болн таңһчин шаңһа йосна хоорндк нөкцлт цааранднь күцәмҗтәһәр делгрҗ, бәәдл-җирһлин чик авг-бәрцин авъяс батллһнд, келн-улсин болн шаҗна хоорндк ниицлт бүрдәлһнд туслх гиҗ ицҗәнәв», - гиҗ йөрәлин үгд келгдҗәнә.
Элстин епархийд дөң күргдг төләднь Москван болн Цуг Әрәсән Әрүн гелң Кирилл Хальмг Таңһчин Толһачиг Туурмҗин болн Күндллһнә III девсңгин орденәр ачлв.
Элстин болн Хальмгин архиепископ Юстиниан Бату Сергеевичд Әрүн Кириллын болн Мефодийин орс чонҗ тосхлһнд дөң күргҗәхднь ханлтан өргҗ, һарсн өдрләнь бас йөрәв. Шаҗна хоорндк нөкцлт делгрүллһнд ик тәвцинь темдгләд, өөдән ачлвр авснлань йөрәһәд, хөв-кишг дурдв. Така сарин 9-д Элстин Хазна чонҗд Москван болн цуг Әрәсән Әрүн гелң бәәсн Тихона үлдсн яс тосч авлһна керг-үүлдвр болхмн. Тер өдр Хальмг Таңһчин Толһач Хаска Батуд өөдән ачлвринь бәрүлҗ өгхмн.
БАТАН Сәәхлә