Таңһчин Толһач мөрә бәрүлҗ өгв

Басң өдрлә Хальмг Таңһчин дунд сурһульмудыг төгсәсн баһчудын байр болв. Эн җил ут тоодан 1508 көвүн-күүкн арвн негдгч классан төгсәһәд, хату цаасан авсмн. Тедн дунд сурһулян йилһән сәәнәр төгсәсн 178 күн алтн медальмүдәр, 139 күн болхла цаһан мөңгн медальмүдәр ачлгдсн болдг. Элстин сурһулин бүрдәц болһнд хату цаас бәрүлҗ өглһнә керг-үүлдврмүдин дару цуһар балһсна Диилврин талвңд цуглрв. Энд сән авъяст тохрсар «Алые паруса» нертә байрин нәр давулгдв.
Хальмг Таңһчин Толһач Хаска Бату, Элст балһсна һардврин ахлач Лиҗикә Алдр, Элст балһсна Хургин ахлач Максим Сорокин терүнд орлцв.
– Мана таңһчд ухата, билгтә, төрскнч седклтә баһчуд өсчәхнь йир сән йовдл мөн. Дунд сурһулян төгсәһәд, иргчдән ямаран эрдмәр көдлхән ода шүүҗ авх кергтә. Номин, билг-эрдмин, бизнесин, тосхлтын болн нань чигн олн халхар сурч болхмн. Иргчдән гүн медрлтә баһчуд орн-нутгин, нег үлү төрскн таңһчиннь делгрлтд тәвцән орулхд иткҗәнәв. Хаалһтн цаһан болтха, – гиҗ Хаска Бату йөрәлин үгдән темдглв.
Тер мет Бату Сергеевич сурһулян йилһән сәәнәр төгсәсн болн олна бәәдл-җирһлд шунмһаһар орлцсн нәәмн көвүн-күүкиг шишлң мөрәһәр ачлв. Терүнәс нань Элстин һардвр ЕГЭ-н шүүврән йилһән сәәнәр өгсн арвтнриг темдгләд, мөңгнә сертификатмуд бәрүлҗ өгв. Келхәс, Элстин лицейиг төгсәсн, ЕГЭ-н шүүврин ашар 200 балл хоршасн Квон Джувон (зургт) 40 миңһн арслңга сертификатар ачлгдсмн.
Ачлврмуд бәрүлҗ өгснә хөөн байрин концерт болв. «Алые паруса» үүдәврин һол дүрмүд Ассоль Грей хойр төгсәһәчнриг йөрәҗ, соньн көтлврән белдҗ.
Керг-үүлдврин йовудт мана орн-нутгт зарлгдсн Төрскән харсачин җиллә ирлцүләд, Элстин баһчуд дәәнд орлцсн өвкнрин санлынь тевчәд, бииһән нерәдв.
Тер өдр «Алые паруса» керг-үүлдврт орлцачнр Элстин Диилврин талвңд өр цәәтл бииләд, җирһлин шин хаалһан тосв.

КАРСАНА Евгения