Таңһчан залх баһчуд

Әрәсән баһчудын сән өдр угтҗ Элстд седвәртә болн таңһчин олна бәәдл-җирһлд шунмһаһар орлцдг күүкд-көвүдин харһлт болв. Хальмг Таңһчин Толһачин медлд «Движение первых» гидг Әрәсән шаңһа җисәнлә нөкцлт батруллһна хүүвин гешүд, шар-шаҗна нарт-делкән ик хургт эврә сән дурар үүлдх улс болн баһчудын Цугәрәсән наадмд орлцачнр терүнд цуглрв. Хальмг Таңһчин залврин Ахлачин дарук– таңһчин то-дигин делгрлтин министр Этән Алексей, Хальмг Таңһчин баһчудын керг-төрин агентствин һардач Камиль Маркеев, таңһчин сурһуль-эрдмин болн номин министрин үүл дааҗадг Натра Антон болн «Яндекс» компаня сурһуль-эрдмин халхар шаңһа йосна бүрдәцслә залһлда батрулдг һардач Дмитрий Растворов күүкд-көвүдиг сән Өдрин байрла йөрәв.

- Удл уга бидн таңһчин автономин 105 җилин болн мана хотл Элст балһсна 160 җилин өөн темдглхвидн, намртан шар-шаҗна нарт-делкән ик хург болхмн. Эн керг-үүлдврмүдт седвәртә, эврә сән дурар үүлддг, шунмһа баһчуд, оютнр, төрскнч седклтә улс орлцад, нарт-делкәд мана таңһчин тускар медүлх зөвтә. Цуг эн керг-үүлдврмүд мана таңһчин нер һарһҗ, делгрлтд туслхнь лавта. Бидн иим улсиг дөңнҗ, дорас өсч йовдг мана баһ үйнр төрскн һазр-усндан дурта болхин төлә цугинь кехвидн. Мана баһчуд күцәмҗтәәһр үүлдҗ, сурһулян сәәнәр сурч, билг-эрдмән делгрүлҗ олнд үлгүр-үзмҗ болна. Таңһчд зурһан җилдән «Яндекс» компань сурһулин көтлвр күцәҗ, сурһульчнрт өдгә цага эв-арһсин медрл дасхчана. Мана нөкцлт делгрҗ йовхнь байрта, -гиҗ министр Этән Алексей келв.
«Движение первых» гидг Әрәсән шаңһа җисәнә таңһчд үүлддг әңгин һардач Анхан Саглр эн җилин түрүн өрәлд кегдсн көдлмшин аш диглҗ, ниицәнә гешүд бәәдл-җирһлд шунмһаһар орлцҗ, кесг кергин седвәр татсиг темдглв. Таңһчд үүлддг эн җисәнә әңгд ут тоодан зурһан миңһн күн орна, эдн зурһата-хөрн тавн наста бичкдүд болн баһчуд болна. Мана таңһчин райодт болн селәдт бәәрн әңг үүлднә. Әрәсән Президентин шиидврәр Төрскән харсачин җил зарлгдсмн, тегәд олна ниицән төрскнч сурһмҗ өглһнә кергт ик оньг өгч, олн зүсн төсв болн көтлвр күцәҗәнә. Эдн «Дәәч» цергә болн спортын белдврин төвин мергҗлтнрлә бат залһлда батрулҗ, хамдан марһас давулна, «Нертә бөдүн күн» гидг төсвин йовудт нер һарсн улс баһчудла дамшлтарн хувалцҗ эднд селвгч болҗ, нөкд болхиг делгрүлхәр зуралҗана. Эн төсв 11 регионд күцәгдв, намртан мана таңһчд бас эклхмн.
Һаха сард болх шар-шаҗна нарт-делкән ик хургт эврә сән дурар үүлддг улс дөңгән күргхдән белн бәәнә. Эдн дунд баһчуд олн, эдн һазадын кел меддг, шулун-шудрмг, седвәртә улс мөн. Кесгнь Цугәрәсән болн нарт-делкән керг-үүлдврмүд давуллһнд орлцад, дамшлт хоршасмн, тегәд мана таңһчд ирх гиичнриг сәәнәр тосч нөкд болхмн.
Нидн Сочи балһснд болсн Цугәрәсән баһчудын наадм бүрдәҗ давуллһнд дөңгән күргсн улст бүрдәмҗин комитетин нерн деерәс Әрәсән Президент Владимир Путин һаран тәвсн Күндллһнә һашгуд бәрүлҗ өггдв. Тиигәд, Анхан Саглр, таңһчин сойлын министрин үүл дааҗадг Түрвән Саглр, СВО-н ветеран Чумуда Николай болн нань чигн улс ачлгдв.

ДООҖАН Наталья