Дааврта кем сән йовудтаһар давҗана

Малчнрин төлә зуни кем дааврта болн чинртә болдгинь заах кергтә, тер юңгад гихлә хаврин цагт сән төл авад, малын то икдүләд, хөн сарин чилгчәр хөөдән кирһлһнә дарани кем эклнә.
Хальмгин селәнә эдл-ахун министерствин зәңглсәр, зуни түрүн сарин ашар таңһчин эдл-ахуст 800 миңһн һар хөн кирһгдв. Тодлхас, мөчн сард Элстд Әрәсән Федерацин Хүүвин Ахлачин негдгч дарук Андрей Яцкинә болн Хальмгин Толһач Хаска Батун һардврт хөөнә ноос кеҗ һарһлһна төрәр ведомственн хоорндк ик селвлцән болла.
Әрәсән залвр 2025-2026 җилмүдин хаалһин зура тогтасна ашт, мана таңһч орн-нутгт торһн ноос кеҗ һарһдг зурһан региона тоод орсмн. Селвлцәнә йовудт ирлцңгү закана болн кадрмуд белдлһнә төрмүд босхгдв, дааврта мергҗлтнрт ирлцңгү даалһвр өггдсн билә.
Хальмг Таңһчин селәнә эдл-ахун министр Гаван Тимурин келсәр, эн җилд торһн ноос эд-бод кеҗ һарһдг фермермүдин төлә шаңһа демин мөңгн 30 процентд икдв. Эн төр хаһллһнд нег һазра арһлачнрт цуг дөң күрггдҗәнә гив. Кирһлһнә кем болхла цаарандан давҗана.
Шидр таңһчд урһц хуралһна кем эклв. Энүнә тускар таңһчин Толһач Хаска Бату ниигмин сүлҗәнд зәңглв. Эн җилд 241,4 миңһн гектар аһу һазрт тәрән тәргдсн билә. Ут тоодан болхла 300 миңһн шаху гектар аһу һазрас урһц хурагдхмн.
Темдглхәс, урдк кесг җилин туршарт мана таңһчд хамгин элвг урһц хурагдсн билә. Һазр яслһна керг-үүлдврмүд давулгдад, эн җилд бас сән урһц хураҗ авхар зуралгдҗана.
Одахн селәнә эдл-ахун министр Гаван Тимур Улсин Хуралын (Парламентин) Ахлач Артем Михайловла болн Әрәсән сенатор Хачирә Борисла хамдан Приютна района «КалмАгроинвест» бүрдәцд одад, урһц хуралһна көдлмшин йовудыг шинҗлв.
– Сүл кесг җилд таңһчд селәнә эдл-ахун шишлң техникин парк шинрүлгдв. Нидн таңһчин селәнә эдл-ахун эдл-ууш кеҗ һарһдг арһлачнр 220 һар шишлң техник болн 15 комбайн хулдҗ авсмн. Кесгнь шаңһас йилһдг демин мөңгәр хулдҗ авсинь келх кергтә. Урһц хуралһна дааврта кемиг сәәнәр болн цаг болзгтнь давулхд цуг таал бәәнә, – гиҗ Гаван Тимур темдглв.
Тер мет залврин болн парламентин элчнр комбайн залад, чинртә көдлмшт бас орлцв. Эн җилин зуни цагт ик халун уга болад, дааврта кем давуллһнд бас туслҗана. Өрүн эрт болн асхарнь серүн болна.
– Өдгә цагт теегт нег миңһн шаху комбайн көдлҗәнә. Теңгрин бәәдл эс хүврхлә, така сарин чилгчәр урһцан бүклднь хураҗ болхмн. Хальмгин Толһач Хаска Батун седвәрәр мана таңһч аграрн-индустриальн регион болхд цуг таал тогтагдҗана, – гиҗ Тимур Сергеевич товчлв.

КАРСАНА Евгения