Күндллһнә аллей шинрүлгдҗәнә

Элстд сән таал тогталһна көдлмш цаарандан давҗана. Элстин һардвр болн ЭГС-ин депутатнр эн төрт ик оньган тусхаҗана. Урҗ өдр балһсна төвд бәәдг Б.Б.Городовиковин нертә Хальмг ик сурһулин негдгч тойгта бәәрин өмн күцәгдҗәдг көдлмшиг Элст балһсна һардврин ахлачин дарук Хаска Сергей бүрткв.
Терүнд дөрвлҗн километр аһуд сән чинртә чолун углҗ тәвгдв. Темдглхд, эннь өдгә цагин шин эв-арһар кеҗ һарһгдв. Удл уга энд сәәхн панрмуд болн сандлмуд тәвгдхмн. Тер мет Хальмгин Келн-улсин архивин гер бас ясгдхмн.
Чинртә көдлмшиг «Стройкомплект» бүрдәцин арвн тосхач күцәҗәнә. Эднә эдлврт «Камаз» тамһта хойр машин болн аца зөөдг нег машин бәәнә. Көдлмш цаг-болзгтнь кегдҗәнә.
Хальмгин Толһач Хаска Батун даалһсар, ЭГС-ин депутатнр Батыра Владимир болн Дорҗин Санл көдлмшиг бүткҗ хәләв. «Күндллһнә аллейд Элст балһсна төвд бәәршлҗәдг учрар өдр болһн олн-әмтн хурна. Тер мет энд эрмдгтә улсин төлә цуг таал бас тогтагдх зөвтә, эн туст көдлмшиг күцәҗәдг бүрдәцин элчнрлә ирлцңгү күүндвр тогтахвидн», гиҗ Владимир Александрович келв.
Намртан болх шар шаҗна нарт-делкән III хургт болн Элст балһсна 160 җилин өөнд белдврин көдлмш цааранднь давҗана. Элстин кесг уульнцс болн хаалһс ясгдад, сән кец-таал тогтагдад, теегин сувсн болҗадг мана Элст олн гиичнрән тосч авхмн.
ОЛЬДАН Цаһан