Шинҗәнә хальмгуд гиичлв

Хальмгуд иигҗ оларн хамцҗ ирдгинь үзәд уга бәәсн болхла, мөчн сарин 26-д Чонкуша Петрин нертә билг-эрдмин колледжд ирхмн билә. Тавн зун күн багтдг бәәрнд нег миңһн үлү күн цуглрв. Тернь баһдад, әмтн зогслго ирәд бәәв. Райодас чигн әмтн ирсн бәәдлтә. Китдин һазрт кесг миңһн дуунад бәәдг хальмгуд ахнр-дүүнрән үзхәр ирсн болҗана. Зуульчллһна халхар зун һучн күн ирсмн. Келн-улсин хувцтаһан балһсна уульнцсар, гиичлүрин өөгүр тедн йовснь олар үзгдв. Хол һазрас ахнр-дүүнр ирҗ йовна гисн зәңг тиигәд хальмгудыг хамцулв.

Хальмг Таңһчд Шинҗәнә хальмгуд ирҗәнә гисн зәңг зөвәр эрт Элстәр тарсн билә. Райодар чигн әмтн медсн бәәҗ.Тегәд Элстин билг-эрдмин колледжд мөчн сарин 26-д концерт болх өдр олн күн тиигәрән темцв. Кееһә хувцан өмссн мана аавнр-ээҗнр автобусас бун гилтә хаалһ керчәд, колледж тал адһв. Нүднь байрар дүүрсн, герлтсн чирәтә эдниг үзсн әмтн теднә ардас дахлдҗ сурһулин эн бәәрнд ирв. Концерт эклтл ик эртәс авн әмтн дүүрәд суувв.
Китдин Шинҗәнә хальмгуд орҗ ирм цацу әмтн альх ташад, ирсн гиичнрин мендинь медҗ, күн болһн һаран суңһҗ, һар атхлдҗ байрлв. Соньн эн нәәриг һардсн номт болн олна үүлдәч Цернә Василий ирсн гиичнр дунд өөрд-хальмгудас нань талдан олн келн- улсин элчнр йовхин тускар келв. Хальмг Таңһчин ачта артистк Нәдвдә Ольга эн концертд орлцв.
Холас ирсн ахнр-дүүнрин концерт «Бумбин орна магталар» эклв. Нег-негнәсн тасрҗ һарсн бийнь «Җаңһран» чееҗдән хадһлад, баһчудтан дасхад хадһлҗ йовхинь цуглрсн улс темдглв. Ут дууна дүүрәнд ирснь чигн, ирүлснь чигн тууҗин йовудт учрсн цуг һашута тоотыг тодлҗ, седкләрн гейүрсн болв.
Келхәс, дуулҗ-биилхиннь өмн гиичнр Иҗл һолын хальмгудтан ирсндән байрлҗ, йөрәлин үгмүдән нерәдҗәв. Эзн Богд хаана туск, үкл уга мөңк нутгин туск дуулвриг соңсад, цуглрсн әмтнә чееҗнь девтәд, седклнь сарулдсн болв.
Аштнь ирҗәх улсин то улм икдәд, концерт цааранднь колледжин һаза болв. Альдас ирсән, ямаран ут хаалһ кесән, энд түрүн ю үзсән гиичнр бәәрн әмтнд келҗ өгв.
Багш Делгрин келсәр, ирсн гиичнр Шинҗәнә кесг һазрт бәәдг болҗ һарв. Байн Һоолас, Или һазрас, Ховг Сәәрәс, нань чигн олн һазрас цуглрад, негдәд Иҗлин хальмгудтан ирсн болдг. Ирсн гиичнр дунд тәвнәс авн найн наста күртл әмтн йовна. Ноха җилтә Делгр тәвн тавта болҗ һарв. Эвтәкн цогцта, герлтә сәәхн өкәр чирәтә Делгрин хувцнь махлань чигн сәәхн, өвәрц зеегәр кеерүлгдснь оньг авлв. Эднә хувцн сәәхн, мадна хувцна бәәдлтә, болв йилһвр чигн бәәнә. Номтнрт болн хальмг хувц уйдг улст эннь соньн болх гиҗ сангдна.
Колледжин һаза болхла нәр йосндан шуугад, ниргәд бәәв. Мендән медлцәд, дууһан дуулад, зурган цокулад, әмтн седкл таварн бәәцхәв. Җаңһрч Окна Цаһан Замин келсәр, ирсн гиичнрин ик зунь малчнр болв. Эдн бийснь мөңгән цуглулад, хол хаалһд һарч йовсмн. Йириндән эдн билгтә улс мөн. Эднә өөр күүкд-көвүднь дахлдн йовҗ ду-би дасна. Бичкнәсн эврә сойлдан хару болна. Нәр болсн цагт захасн босч, дуулад-бииләд, көгҗм татад, сергмҗтәһәр амрна.
«Өсрсн цусн, тасрсн махн» гиһәд Шинҗәнә билгтнр халуч седклән медүлҗ, билг-эрдмән хальмгудтан нерәдв. Эн концертин тускар олн һазрас, тер дотр Москвад сурчадг баһчудас видеозәңгс ирҗ, Хальмгт Шинҗәнәс хальмгуд ирсн байрта зәңгәрн эдн хувалцв.
Улан залата хальмгудтан ирсн Шинҗәнә гиичнр маңһдуртнь Диилврин паркд ик концерт үзүлҗ, олн-әмтиг байрлулв. Төрлмүдин чирә үзҗ, седклән медлцҗ күүндсндән икәр байрлҗ гиичнр хәрв. Зууран эдн Цаһан Амнд күрәд, Иҗл һолд мөргәд, өвкнрин санлыг тевчәд, Аһшар дамҗад, Санкт-Петербургд одад, герүрн хәрв.

ҖИРҺЛИН Кермн